गणेश लामाद्वारा काँग्रेस केन्द्रीय सदस्यमा उम्मेदवारी घोषणा

नेपाली काँग्रेस काभ्रेका युवा नेता गणेश लामाले १४ औँ महाधिवेशनमा केन्द्रीय सदस्य पदमा उम्मदेवारी दिने तयारी गर्नुभएको छ ।

लामाका निकटस्थहरुले प्रचार सामग्री बनाएर सामाजिक सञ्जाल मार्फत भोट माग्न सुरु गरिसकेका छन् । लामा काभ्रे संघीय निर्वाचन क्षेत्र नम्बर १ बाट केहि महिना अघि सकिएको १४ औँ अधिवेशनबाट महासमिति सदस्यमा निर्वाचित हुनुभएको थियो ।

लामा अत्याधिक मत सहित महासमिति सदस्यमा विजयी हुनु भएको थियो । विजय कुमार गच्छदारले नेतृत्व गरेको तत्कालिन लोकतान्त्रिक फोरमका केन्द्रीय सदस्य हुनुहुन्थ्यो । अहिले गच्छदारको पार्टी काँग्रेसमा विलय भएपछि महाधिवेशन मार्फत नै नेता लामा काँग्रेसको केन्द्रीय सदस्य बन्न लाग्नु भएको हो ।

गणेश लामा शेर बहादुर देउवा प्यालनबाटै केन्द्रीय सदस्यमा प्रतिस्पर्धा गर्नुहुनेछ । बागमति प्रदेशमा पनि गणेश लामाको समूह देउवा प्यालनमा खुलेरै लागेको थियो । लामालाई देउवाले पनि नजिकबाट चिन्ने गरेको बताइन्छ ।

गण्डकी प्रदेशमा एमालेको सरकार ढालेर काँग्रेसको सरकार बनाउन गणेश लामा नै परिचालित हुनुभएको थियो । गण्डकी प्रदेशको सरकारमा निर्णयक मानिएका सांसद दिपक मानाङ्गेलाई मनाएर एमाले सरकार गिराउन गणेश लामा पोखरामै पुग्नुभएको थियो ।

गण्डकी प्रदेश नेपाली काँग्रेसको पहिलो सरकार हो । त्यसको गुण तिर्न पनि लामालाई देउवाले जसरी पनि केन्द्रीय सदस्यमा निर्वाचित गराउने उनी निकटकाहरु बताउँछन् । गणेश लामा २०७४ सालमा भएको प्रदेश सभाको निर्वाचनमा एमालेका उम्मेदवार चन्द्र लामासँग पराजित हुनुभएको थियो ।