अबको तीन वर्षभित्र पुरा हुनेछ ‘मन्डनदेउपुर बृहत सुख्खा क्षेत्र खानेपानी आयोजना’

काभ्रेको मण्डनदेउपुर नगरपालिकाको गौरबको आयोजनाभित्र पर्ने ‘मन्डनदेउपुर बृहत सुख्खा क्षेत्र खानेपानी आयोजना’ को अगामी तीन वर्षभित्र सकिनेछ । आर्थिक वर्ष २०८०/८१ को असार मसान्तभित्र सकाउनु पर्ने समयसिमा तोकिएको छ ।

‘मण्डनदेउपुर बृहत सुख्खा क्षेत्र खानेपानी आयोजना’ को मुख्य ट्याङ्की नगरपालिकाको वडा नम्बर १० को थामडाँडामा निर्माण हुनेछ । इन्द्रवती नदीको वडा नम्बर १० को नारिमखर्क र वडा नम्बर ७ को सोतेबाट मुख्य ट्यांकीमा पानी खसालिने छ ।

दुईवटा समवाएल निर्माण हुनेछ । इन्द्रवती नदीको पानी प्रशोधन गरेर थामडाँडाको मुख्य ट्याङ्कीमा खसालिनेछ । थामडाँडा इन्द्रवतीबाट ९ सय उचाईमा छ । त्यस्तै थुम्की डाँडा पानी दोस्रो मुख्य ट्याङकी निर्माण हुनेछ । यो आयोजना मल्ट्रि आरटी सिस्टमको परियोजना हो ।

यो आयोजना अन्तर्गत विभिन्न ठाउँमा फरक फरक क्षमताका ३० वटा ट्याङ्की निर्माण हुने संघीय खानेपानी तथा ढल ब्यवस्थापन आयोजना भक्तपुरका प्रमुख राजेन्द्र श्रेष्ठले बताउनुभयो । २३ वटा वितरण ट्यांकी बन्नेछ । वितरण ट्यांकी २० देखि १ सय घनमिटरसम्मको निर्माण हुनेछ । पम्पीङ गर्ने ७ वटा ट्यांकी निर्माण गरिनेछ । जुन ट्यांकी ४० देखि २ सय घनमिटरका हुनेछन् ।

मूख्य पाइलान ३६ किलोमिटरको हुनेछ । वितरण लाइन भने १५४ किलो मिटर हुने संघीय खानेपानी तथा ढल ब्यवस्थापन आयोजना भक्तपुरका प्रमुख राजेन्द्र श्रेष्ठले जानकारी दिनुभयो । सबै गरेर करिब १८० किलोमिटरको हाराहारीमा पाइप लाइनको काम हुनेछ ।

यो आयोजनाबाट मण्डनदेउपुर नगरपालिकाको ४, ५, ६, ७, ८, ९, १०, ११ र १२ का ५ हजार ५ सय ५ घरधुरी लाभान्वित हुने उपभोक्ता समितिका अध्यक्ष राम बहादुर तामाङले जानकारी दिनुभयो । ८४ करोड ४० लाख लागत अनुमान गरिएको यो आयोजनाको ठेक्का सम्झौता ५४ करोडमा भएको छ । शर्मा–लामा–रमण जेभीले आयोजनाको ठेक्का पाएको छ ।

तीन बर्षभित्र आयोजनाको निर्माण भैसक्ने संघीय खानेपानी तथा ढल ब्यवस्थापन आयोजनाका प्रमुख श्रेष्ठले बताउनुभयो । ‘आयोजनाको काम सुरु भइसकेको छ । तीन वर्षभित्र सकाउने निर्माण कम्पनीलाई जिम्मा छ । चुनौती युक्त आयोजना हो । तर यहाँका सबै पक्ष मिल्दा यो चुनौतीलाई पार गर्दै पानीको पर्खाइमा रहेका मण्डनदेउपुर नगरपालिकाका ९ वटा वडाका नागरिकको घरसम्म पुर्याउन सफलता मिल्नेछ । श्रेष्ठले भन्नुभयो ।’

मण्डनदेउपुरका नगरप्रमुख टोक बहादुर वाइबाले चुनावमा जनता माझ गरिएको प्रतिबद्धता लगभग पुरा हुने चरणमा पुगेको दाबी गर्नुभयो । ‘हामीले चुनावका बेला हरेक नागरिकको घरमा पानी धारा भनेका थियौँ । त्यो लगभग अन्तिम चरणमा पुगेको छ । केहि वर्ष ढिला होला तर सबै नगरबासीको घर घरमा धारा पुग्नेछ । नगर प्रमुख वाइबाले भन्नुभयो ।’