मन्त्री खतिवडाले काभ्रे सिपालीका जनतासँग कानेखुसीमा के भने (भिडिओ)

प्रायः जसो मन्त्रीहरु औपचारिक कार्यक्रम तिर जाँदा सहभागि भएको ठाउँमा जाने र उनीहरुको कुरा सुनेको निकै कम देखिन्छ । चाहे त्यो सुरक्षाका कारण हो वा घुलमिल हुन नचाहेर ।

तर शनिबार रोशी गाउँपालिका वडा नम्बर ६ को खट्टेखोलामा भने स्वास्थ्य तथा जनसंख्या मन्त्री विरोध खतिवडाले कार्यक्रमका सहभागिसँग साक्षात्कार गरेर मन जितेका छन् ।

शनिबार वडा नम्बर ६ मा नेकपा (एकीकृत समाजवादी) को वडा भेला थियो । मन्त्री खतिवडा भेलाको प्रमुख अतिथि हुनुहुन्थ्यो । कार्यक्रममा सहभागिहरु आउँदै थिए । राखिएका कुर्सीहरु बिस्तारै भरिदैँ थियो । कार्यक्रम सुरु भइसकेको थिएन ।

मन्त्री खतिवडाले खट्टेखोला बजारकै एक होटलमा खाना खाए । कार्यक्रम भएको ठाउँ तर्फ हिडेँ । उनी मञ्चमा बसेनन् । सिधैँ सहभागि बसेको ठाउँ तर्फ लागे । सुरक्षा कर्मीहरु छक्क परे । दोस्रो लहरको कुर्सीमा बसेका सहभागिसँगै गएर बसे ।

दोस्रो लहरको कुर्सीमा सिपाली डाँडाका ७२ बर्षीय तीर्थ बहादुर लामा, कुर्खेपाखाका ६२ बर्षीय सुरथ सिं जिम्बा र सिपाली डाँडाकै ७९ बर्षीय दमाई सिं तामाङ बसेका थिए । आफुहरुसँगै मन्त्री बस्न आइपुग्दा तीनै जना दंग परे । मन्त्रीले आफ्नो परिचय दिए । तीनै जनाको नाम र गाउँ सोधे । उनीहरुले पनि आ आफ्नो गाउँ र नाम मन्त्रीलाई सुनाए ।

दायाँ बायाँ बसेका अन्य सहभागि पनि छक्क परे । सहभागिहरु भएकै ठाउँमा आएर मन्त्री बसेको देख्दा । खेती किसान, घर परिवार संख्या, आय आर्जनको कुरा मन्त्रीले सोधे । उनीहरुले बताए । तीन जना मध्ये तीर्थ बहादुर लामा अलिक जिज्ञासु हुनुहन्थ्यो । मन्त्रीको जिल्ला मकवानपुरको बारे पनि हालखबर सोधे तीर्थले ।

तीर्थले नै गाउँमा एउटै बोटको कम्तीमा ९० लाख रुपैँया पर्ने बुद्धचित्त रहेको मन्त्रीलाई सुनाए । मन्त्रीले कसले सोपेको थियो भनेर सोधे । तीर्थले जवाफ फर्काए । पहिले एक जना बाहुनले रोपेर गएका रहेछन् । अहिले त्यहि मालाका लागि कहिले काँहि झगडा पनि पर्छ । मन्त्रीले सिपाली गाउँको विकास निर्माणका बारे पनि चासो राखे । तीनै जनाले पालै पालो आ आफ्नो गाउँमा भइरहेको विकास निर्माणको कुरा सुनाए ।

मन्त्री आफुहरुसँगै बसेको मौका तीर्थ लामाले छोपी होले । गाउँमा राम्रो स्वास्थ्य संस्था नभएको कुरा मन्त्री खतिवडालाई सुनाए । मन्त्रीले तत्कालै सकेको सहयोग गर्ने जवाफ फर्काए । उनीहरु खुशी भए । ‘यसरी मन्त्री स्वयम जनता भएको ठाउँमा भेट्न आएर, हाम्रो पनि कुरा सुनेको मेरो जीवनमा पहिलो पटक हो । म काठमाण्डौमा काम गर्न बस्दा धेरै पटक मन्त्रीहरुलाई प्रत्यक्ष देखेको थिए । तर गाउँमै आएर यसरी सबै कुरा सोधी खोजी गरेको पहिलो पटक हो । निकै खुशी लाग्यो । तीर्थले मिलिजुली खबरसँग भन्नुभयो ।’

भिडिओ हेरौँ