‘मण्डनदेउपुर बृहत सुख्खा क्षेत्र खानेपानी आयोजना’ को काम सुरु

काभ्रेको मण्डनदेउपुर नगरपालिकामा ‘मण्डनदेउपुर बृहत सुख्खा क्षेत्र खानेपानी आयोजना’ को काम सुरु भएको छ ।

आयोजनाको २० देखि २५ प्रतिशतसम्म काम सकिसकेको मण्डनदेउपुर बृहत सुख्खा क्षेत्र खानेपानी तथा सरसफाई उपभोक्ता समितिका अध्यक्ष राम बहादुर लामाले जानकारी दिनुभयो । ट्यांकी निर्माण सुरु भइसकेको छ ।

‘आयोजनाको निर्माण कार्य सुरु भएको छ । ठेक्कदार कम्पनीले कामलाई निकै रफतारका साथ अघि बढाएको छ । हामी काभ्रे जिल्लाका अन्य सुख्खा क्षेत्र खानेपानी आयोजना जस्तो समयमै नसकिने अवस्था आउन नदिन दिनरात खटिरहेका छौ । ट्यांकी निर्माण देखि पाइप लाइन बिछ्याउने काम तीब्र गतिमा भइरहेको छ । मुहानमा भने अलिक समयपछि काम सुरु हुन्छ । मण्डनदेउपुर बृहत सुख्खा क्षेत्र खानेपानी तथा सरसफाई उपभोक्ता समितिका अध्यक्ष लामाले भन्नुभयो ।’

त्यस्तै आयोजना स्थलमा पाइप पुर्याउने काम भइरहेको छ । पाइप लाइन खन्ने काम पनि केहि ठाउँमा सुरु भइसकेको छ । झण्डै ३ सय मजदुर आयोजना क्षेत्रमा खटिएका छन् । समयमै आयोजना सकिउन उपभोक्ता समितिका अध्यक्ष सहित पदाधिकारीहरुले समन्वयको काम गरिरहेका छन् ।

नगरपालिकाले आवश्यक पर्ने कुनै पनि प्रक्रियामा झझन्टिलो बनाइदिएको छैन् । ‘यो हाम्रो नगरपालिकाको धेरै दाजुभाई दिदी बहिनीको दैनिक जीवनसँग सरोकार राख्ने योजना हो । हामी सकेसम्म समयभन्दा अघि नै गुणस्तरीय काम सकियोस् भन्ने चाहान्छाँै । त्यसका लागि नगरपालिकासँग सम्बन्धीत कुनै पनि काममा ढिला गरेर अड्काउने भन्ने हुदैँन् । नगरप्रमुख टोक बहादुर वाइबाले भन्नुभयो ।’

‘मण्डनदेउपुर बृहत सुख्खा क्षेत्र खानेपानी आयोजना’ को मुख्य ट्याङ्की नगरपालिकाको वडा नम्बर १० को थामडाँडामा निर्माण हुनेछ । वडा नम्बर १० को नारिमखर्क र वडा नम्बर ७ को सोतेबाट मुख्य ट्यांकीमा पानी खसालिने छ ।

यो आयोजना अन्तर्गत ३० वटा ट्याङ्की निर्माण हुने संघीय खानेपानी तथा ढल ब्यवस्थापन आयोजना भक्तपुरका प्रमुख राजेन्द्र श्रेष्ठले मिलिजुली खबरलाई बताउनुभयो । ठेक्केदार कम्पनीले इन्जिनियर र प्राविधिक फिल्डमा खटाएर कामको रेखदेखलाई बढाएको छ ।

यो आयोजनाबाट मण्डनदेउपुर नगरपालिकाको ४, ५, ६, ७, ८, ९, १०, ११ र १२ का ५ हजार ५ सय ५ घरधुरी लाभान्वित हुने उपभोक्ता समितिका अध्यक्ष राम बहादुर तामाङले जानकारी दिनुभयो । यो आयोजनाका लागि ५४ करोडको ठेक्का सम्झौता भैसकेको छ । तीन बर्षभित्र निर्माण भैसक्ने आयोजनाका प्रमुख श्रेष्ठले बताउनुभयो ।

आयोजना शर्मा–लामा–रमण जेबी मार्फत निर्माण गरिरहेको छ ।