काभ्रे काँग्रेसको जिल्ला कार्यसमितिमा शिव प्यानलको रजाँई, मधु प्यानलको कन्तबिजोक

काभ्रेमा शिव हुमागाई र मधु आचार्य प्यानल बीचको चुनावी भिडन्त सोचे भन्दा निकै फरक देखिएको छ । धेरैले जिल्ला उपसभापति नै सभापतिको उम्मेदवार बनेकाले निकै कडा प्रतिस्पर्धा हुने अनुमान गरेका थिए ।

तर त्यो अनुमानलाई मात खुवाइदैँ शिव हुमागाई प्यानलले जिल्ला कार्यसमितिको लगभग सबै पदमा आफ्नो स्पष्ट जीत निकालेको छ । निर्वाचन अघि आएको विभिन्न टिकाटिप्पणीले शिव हुमागाई स्वयम निकै तनाबमा थिए । खास गरी शिवको समूहले अच्युत पौडेललाई सघाउने तयारी गरिरहेको बारे मिलिजुली खबरले समाचार प्रकाशन गरेको थियो ।

उक्त समाचारले दबाब परेपछि शिव हुमागाईले अधिवेशनको अघिल्लो दिन राति हतार हतार आकस्मिक पत्रकार सम्मेलन नै गर्नु परेको थियो । शिव हुमागाईले उक्त पत्रकार सम्मेलनमा आफ्नो अधिकारिक समूह तीर्थ लामा सभापतिको उम्मेदवार सहितको रहेको भन्दै अरुलाई सहयोग गर्न नसक्ने स्पष्टिकरण दिनुभएको थियो ।

नभन्दै हुमागाईले पत्रकार सम्मेलनमा बोलेको बचनलाई ब्यवहारमा उतार्नुभयो । र आफ्नो समूहका सबै पदाधिकारी र सदस्यहरुलाई विजयी गराउन सफल हुनुभएको छ । तर जिल्लामा मधु आचार्य समूह भने नराम्रोसँग पराजय ब्यहोर्न बाध्य भएको छ ।

यदि मधु समूहले सहमति चाहेको हो भने सभापति शिव प्यानलाई छोडेर अन्य पदाधिकारीमा आफ्नो टिमका ब्यक्ति आउने सम्भावना थियो । वा सभापति सहित बहुमत सदस्य शिव प्यानललाई दिएर जिल्ला कार्यसमितिमा आफ्नो समूहको पनि उपस्थिति गराउन सक्थ्यो मधु समूहले । तर त्यो सहमति हुन सकेन । निर्वाचनमा दुबै प्यानल टिम बनाएर लडे ।

निर्वाचनबाट शिव प्यानलका सबै उम्मेदवारहरु अत्याधिक मत सहित विजयी हुँदा मधु प्यानलका उम्मेदवारहरुको मत समेत निकै कम छ । मधु समूहका कतिपय उम्मेदवारहरुले राति मतदान गर्दा शिव प्यानलले आफु अनुकुल गरेको आरोप लगाएका छन् । त्यो पनि मत परिणाम सार्वजनिक भइसकेपछि लगाइएका यस्ता आरोपको खासै अर्थ छैन् । यदि मतदानमा कुनै समूहले आफु खुशी गरिरहेको हो भने त्यहि बेला भन्न सक्नु पर्थ्यो ।

मधु समूहले निर्वाचन क्षेत्र नम्बर १ र २ मा आफ्नो समूहले प्राप्त गरेको मत बाहेक अन्य मत बटुल्न नसकेको प्रष्टै हुन्छ । सहमति गरेको हो भने मधु प्यानलबाट सम्भावना बोकेका कयौँ नेताहरु जिल्ला कार्यसमितिमा बसेर काम गर्न पाउथे । सहमतिको ढोका बन्द गर्दै दुबै पक्ष निर्वाचनमा गएपछि मधु समूह नराम्रो बढारिएको छ । यसको प्रत्यक्ष असर आगामी स्थानीय तह, संघ र प्रदेशको निर्वाचनमा देखिने कतिपय काँग्रेस निकटस्थहरु बताउँछन् ।