गोकुल बाँस्कोटाले कुन ‘स’ मा उम्मेदवारी देलान् ?

नेकपा एमालेको १० औँ राष्ट्रिय महाधिवेशन नजिकै गर्दा नेताहरुले उम्मेदवारी घोषणा गर्न थालेका छन् ।

काभ्रे जिल्लामा हालसम्म कुनै पनि एमाले नेताहरुले औपचारिक रुपमा उम्मेदवारी घोषणा गरेका छैन् । पूर्व मन्त्री एवं एमाले काभ्रेका इन्चार्ज गोकुल बाँस्कोटाले पनि अहिलेसम्म कुनै पदमा उम्मेदवारी दिने निक्र्यौल गरि नसकेको बताइन्छ ।

तर पछिल्लो समय राजधानी काठमाण्डौका केहि मिडिया मार्फत भने बाँस्कोटाले आफु पनि १० औँ महाधिवेशनमा उम्मेदवार रहने जनाउ दिइसक्नुभएको छ । संवाददाताहरुको जिज्ञासामा बाँस्कोटाले केन्द्रीय सदस्यदेखि केन्द्रीय सचिबसम्मका पदमा आफ्नो उम्मेदवार रहन सक्ने बताउनु भएको हो ।

स्रोतका अनुसार महेश बस्नेतले जुन पदमा उम्मेदवारी दिन्छन् बाँस्कोटाले पनि सोहि पदमा उम्मेदवारी दिनेछन् । एमालेभित्र पछिल्लो समय सबैभन्दा बढी शक्ति संघर्ष गोकुल बाँस्कोटा र महेश बस्नेत बीच रहेको जानकारहरु बताउँछन् ।

बाँस्कोटा र बस्नेत दुबै एकले अर्कोलाई पार्टी अध्यक्ष केपी ओलीको अत्यन्तै विश्वासिलो पात्रोको रुपमा बुझ्दै आएका छन् । यसअघि केपी ओली सरकारको अन्तिम मन्त्रीपरिषद् विस्तारमा समेत बस्नेतलाई गृह मन्त्री बनाउने ओलीको पूर्ववत् योजनामा बाँस्कोटाले खेल्दा गृहमन्त्री बन्न नपाएको बुझाइ बस्नेत पक्षको छ ।

महेश बस्नेतले सचिब पदका लागि आफु योग्य रहेको १० बुँदे दाबी सहित उम्मेदवारी घोषणा गरिसकेका छन् । बाँस्कोटाको तुलनामा केपी ओलीको बचाउमा समेत बस्नेत फ्रण्ड लाइनमा रहेर प्रतिबाद गर्दै आइरहनुभएको छ ।