बाल वातावरण केन्द्र नेपालद्वारा चण्डेनी माविमा शिक्षकलाई प्रशिक्षण

बालबालिकाको क्षेत्रमा काम गर्दै आएको बाल वातावरण केन्द्रले काभ्रेको मण्डनदेउपुर नगरपालिका वडा नम्बर ११ मा रहेको चण्डेनी माध्यामिक विद्यालयमा शिक्षकहरूलाई बालअधिकार बारे प्रशिक्षण दिएको छ ।

अन्तराष्ट्रिय बाल दिवस तथा संस्थाको २० औँ बार्षिकउत्सवको पूर्व सन्ध्यामा संस्थाले शिक्षकहरू प्रशिक्षण दिएको हो । प्रशिक्षण कार्यक्रममा १३ वटा मावि सहित १७ वटा विद्यालयका २४ जना प्रधानाध्यापक तथा शिक्षकहरू सहभागी थिए ।

कार्यक्रममा बोल्दै मण्डनदेउपुर नगरपालिकाका नगरप्रमुख टोक बहादुर वाइबाले शिक्षामा नगरपालिकाले धेरै लगानी गरेको भन्दै गुणस्तरीय शिक्षामा नगरपालिकाले कुनै कन्जुस्याइँ नगर्ने बताउनुभयो । राज्यको पुनःसंरचनासंगै शिक्षामा पनि पुनःसंरचना गरेर अघि बढ्न जरुरी रहेको बताउनुभयो ।

बालबालिकालाई विद्यालयमा आएपछि पढौँ पढौँ लाग्ने वातावरण निर्माण गर्न आवश्यक रहेको नगरप्रमुख वाईबाले बताउनुभयो । बालबालिकालाई सहि बाटोमा दोहोर्याउन सकेमात्रै भाबी पुस्ता अब्बल हुने नगरप्रमुख वाईबाको भनाई छ ।

‘मातृभाषालाई समेत नगरपालिकाले पठनपाठनमा जोड दिईरहेको छ । स्थानीय पाठ्यक्रम बनाएर पठनपाठन गर्नेमा नगरपालिका अघि बढेको छ । तर कोभिडले हामीलाई केहि असर गरेको छ । त्यस असरलाई पूर्ति गर्ने गरी पठनपाठनलाई मजबुद गराउन आवश्यक छ । नगरप्रमुख ब्याञ्जुले भन्नुभयो ।’

कार्यक्रममा बाल वातावरण केन्द्र नेपालका कार्यकारी निर्देशक अशोक शिवकोटी, बालबालिकालाई कस्तो बनाउने भन्ने हात शिक्षकको रहेको भन्दै जिम्मेवारी बोधले मात्रै त्यो प्राप्ति हुने बताउनुभयो । बालअधिकारलाई सधै, सबै पक्षले उत्तिकै दायित्व बोध गर्नु पर्ने बताउनुभयो ।

‘मण्डनदेउपुर नगरपालिकाको तीन वटा विद्यालयमा विभिन्न कार्यक्रम गर्दै आएको छ । घर परिवारमा आमा, बुबा र आफन्तबाट समेत बालअधिकार हनन् हुन सक्ने भएकाले राज्य, समाज र परिवारले जिम्मेवारी बोध गर्नु पर्छ । अनि मात्रै सबै बालबालिकाको उचित हिसाबले पढ्न, लेख्न, खाना, बस्न, लाउन निर्धक्कसंग पाउँछन् । कार्यकारी निर्देशक शिवकोटीले भन्नुभयो ।’

उहाँले बाल वातावरण केन्द्रले मण्डनदेउपुर नगरपालिकामा थप कार्यक्रम ल्याउने बताउनुभयो । संस्था निस्शुल्क मनोसामाजिक विमर्श सेवा पनि सुरू गरेको छ । संस्थाले विभिन्न शैक्षिक सामाग्री पनि वितरण गरेको छ । उहाँले मण्डनदेउपुर नगरपालिकालाई बालमैत्री नगर घोषणामा सहकार्य गर्न तयार रहेको बताउनुभयो ।

यो संस्थाले चण्डेनी माध्यामिक विद्यालयमा अध्ययनरत ३० जना विद्यार्थीका परिवार र पञ्चकन्या आधारभूत विद्यालयका २० जना विद्यार्थीको परिवार गरी ५० जनाको स्वास्थ्य बिमा गरिदिएको छ । यो संस्थाले डेडीथुम्का माध्यामिक विद्यालयमा पनि कार्यक्रम लागु गरेको छ ।