काभ्रे काँग्रेसले आज प्रदेश निर्वाचन क्षेत्रमा अधिवेशन गर्दै छ । कुनै पनि प्रदेश निर्वाचन क्षेत्रमा सर्वसम्मत समिति चयन नहुने देखिएको छ ।
जिल्लामा शिव–तीर्थ समूह र मधु आचार्य समूह प्रतिस्पर्धामा उत्रिएका छन् । मुख्य विर्नाचन अधिकृत राजेन्द्र लामिछानेका अनुसार निर्वाचन प्रक्रिया अहिले बिहान ८ बजदेखि सुरु हुने छ । साँझ पाँच बजेसम्म मतदान प्रक्रिया भैसक्ने बताइएको छ ।
संघीय निर्वाचन क्षेत्र नम्बर १ अन्र्तगतको प्रदेश निर्वाचन क्षेत्र नम्बर (क) को अधिवेशन भकुण्डेबेसीमा र (ख) को पनौतीमा हुने छ । त्यस्तै संघीय निर्वाचन क्षेत्र नम्बर २ अन्तर्गतको प्रदेश निर्वाचन क्षेत्र नम्बर (क) को धुलिखेलमा र (ख) को बनेपामा अधिवेशन हुने मुख्य निर्वाचन अधिकृत लामिछानेले बताउनुभयो ।
यी चार वटै क्षेत्रका लागि मतदान अधिकारीहरु अधिवेशन स्थलमा पुगिसकेका छन् । चारै निर्वाचन क्षेत्रमा गरी कुल २५ सय ४३ जना प्रतिनिधिले मतदान गर्ने छन् । यी प्रतिनिधिले प्रत्येक प्रदेश निर्वाचन क्षेत्रमा ७ जना पदाधिकारी, कम्तिमा १६ जना सदस्य र अल्पसंख्य, मधेशी, मुस्लिम, अपाङ्गता, पिछडिएको वर्ग छन् भने यो क्लस्टरबाट १ जना सदस्यका लालि मतदान गर्ने छन् ।
निर्वाचन सकिए लगत्तै मतगणना सुरु गरिनेछ । यसअघि पालिका र वडा अधिवेशनमा जस्तो हालसम्म कुनै पनि प्रदेश निर्वाचन क्षेत्रमा विवाद नरहेको मुख्य निर्वाचन अधिकृत लामिछानेले बताउनुभयो । अधिकांश ठाउँको मतपरिणाम आजै आउने गरि तयारी गरिएको छ । विवाद भएन भने सबै ठाउँको मतपरिणाम आज राती अबेरसम्म आइसक्नेछ ।
Facebook Comments