काभ्रे काँग्रेस अधिवेशनः यसरी भयो तीर्थ र शिवको पुर्नमिलन

काभ्रे निर्वाचन क्षेत्र नम्बर १ का काँग्रेस सभापति तीर्थ लामा र पूर्व जिल्ला सभापति शिव हुमागाईबीच एक साता नपुग्दै पुर्नमिलन भएको छ ।

स्रोतका अनुसार आज केन्द्रिय सभापति शेर बहादुर देउवाको निजी निवास बुढानिलकण्ठमा भएको तीर्थ लामा र शिव हुमागाई बीचको वान टु वान कुराकानीपछि पुनःमिलन सम्भव भएको हो । पूर्व जिल्लासभापति हुमागाई क्षेत्रिय सभापति लामाले एकाएक गुट फेरपछि अत्तालिएका थिए ।

लाामाको समूहलाई जिल्ला सभापति मधु आचार्य समूहले समेत पूर्ण साथ दिने भएपछि हुमागाई थप संकटमा परेका थिए । तर आज एकाएक बुढानिलकण्ठमा भएको बार्ताले दुई नेताबीच पुरानै गुटलाई सक्रिय बढाउने सहमति बनेको हो । शिव हुमागाई नेता कृष्ण प्रसाद सिटौलाको गुट चलाउनुहुन्छ भने तीर्थ लामा पार्टी सभापति शेर बहादुर देउवाको गुट चलाउँदै आइरहनुभएको छ ।

तीर्थ लामा समूहको बलमा हुमागाईले शक्तिशाली बन्दै आइरहनुभएको छ । केहिदिन शिव र तीर्थ लामा बीच खटपट भएपनि पुनः एउटै गुटमा बस्ने सहमति पछि काभ्रे काँग्रेसमा नयाँ तरंग सिर्जना भएको छ । नयाँ समीकरणसँग प्रदेश निर्वाचन क्षेत्र र संघ निर्वाचन क्षेत्रमा दुबै समूहबाट उम्मेदवार समेत घोषणा गरिएको थियो । तर आज लामा र हुमागाईबीच सहमतिले केहि हेरफेर हुने देखिएको छ ।

हुमागाई र लामा समूहले भोली २ बजे बनेपाको एक पार्टी प्यालेसमा कार्याक्रमको आयोजना गरी जिल्ला सभापति सहितको पदाधिकारी, प्रदेश निर्वाचन क्षेत्र, संघीय निर्वाचन क्षेत्र र क्षेत्रिय समिति घोषणा गर्ने जनाएको छ । नयाँ समीकरण पछि मधु आचार्य समूह थप रणनीति बनाउन ब्यस्त देखिएको छ । तीर्थ लामा समूह आफुहरुसँग आएपछि हौसिएको आचार्य समूहमा फेरी नैराष्यता देखिन थालेको छ ।