काभ्रेमा पनि जनगणना सुरुः ५११ जना गणक र १२७ जना सुपरीवेक्षक फिल्डमा

काभ्रेमा पनि जनगणना सुरु भएको छ । आजबाट जिल्लाभर जनगणना सुरु भएको जिल्ला जनगणना कार्यालयका जनगणना अधिकारी दिपक कोइरालाले जानकारी दिनुभयो ।

नेपालको संघीय संचनापछि पहिलो जनगणना सुरु भएको हो । यो जनगणना १२ औँ हो । नेपालमा पहिलो पटक विक्रम सम्बत १९६८ सालमा जनगणना गर्न सुरु गरिएको थियो ।

जिल्ला जनगणना कार्यालयले आज धुलिखेलमा पत्रकार सम्मेलन गरेर दिएको जानकारी अनुसार जिल्लाभर ५ सय ११ जना गणक फिल्डमा खटिएका छन् । त्यस्तै १२७ जना सुपरीवेक्षक परिचालित छन् ।

जिल्लाको धुलिखेल, पनौती, पाँचखाल, भकुण्डेबेसी, कटुन्जेबेसी र भुम्लु गाउँपालिकामा गरी ६ वटा स्थानीय जनगणना कार्यालय स्थापना गरिएको छ । गणकहरु घर घरमा पुग्ने छन् । आजबाट सुरु भएको तथ्याङ्क संकलनको काम मंसिर ९ गते सकिने छ ।

यसअघि भदौ ३० गतेदेखि असाजे १८ गतेसम्म घर तथा घर परिवार सूचीकरण गरिएको थियो । त्यहि सूचीकरणको आधारमा गणकहरु मुख्य गरी ५५ वटा प्रनावली सहित घर घर पुग्न थालेको जनगणना अधिकारी दिपक कोइरालाले बताउनुभयो ।

गणकहरु बिहान ७ बजेदेखि साँझ ५ बजेसम्म गणकहरुले काम गर्ने छन् । ५५ वटा प्रश्नावली पुरा गर्न २५ देखि ३० मिनेटसम्म लाग्ने जनगणना अधिकारी कोइरालाले बताउनुभयो । अधिकांश गणकहरु स्थानीय छैन् । त्यहि भएर यो पटकको तथ्याङ्क गुणस्तरीय आउनेमा आफुहरु विश्वास्त रहेको जनगणना अधिकारी कोइरालाको भनाई छ ।

घरमा आउने गणकहरुलाई आफ्नो विवरण टिपाएर सहयोग गरिदिन कोइरालाले आग्रह गर्नुभयो । ‘हामी यो पटक निकै उर्जाशील र युवा गणकहरु पाएका छौ । जसले गर्दा गुणस्तरीय तथ्याङ्क आउनेमा हाम्रो कार्यालय विश्वास्त छ । अघिल्लो पटकका जनगणनाहरुमा अधिकांश शिक्षकहरु प्रिचालित हुन्थे । आफ्नै घर वा वल्लो डाँडामा बसेर प्रश्नावली भर्ने र त्यसैको आधारमा तथ्याङ्कको विश्लेषण गरिन्थ्यो । तर यो पटक पहिलेको जस्तो पटक्कै हुने छैन् । हामीले गणक र सुपरीवेक्षकहरुलाई निकै मेहेनतका साथ तालिम दिएर फिल्डमा खटाएका छौ, जनगणना अधिकारी कोइरालाले भन्नुभयो ।’

कार्यक्रममा प्रमूख जिल्ला अधिकारी शिवराम पोखरेलले यो पटक अघिल्लो दश वर्ष अघिको त्रृटि नदोहोरिने दाबी गर्नुभयो । सञ्चारकर्मीसंग प्रमूख जिल्ला अधिकारी पोखरेलले यो पटक काभ्रे जिल्लाको यर्थाथपरक तथ्याङ्क आउनेमा ढुक्क हुन आग्रह गनुृभयो । घर घर पुगेर संकलन गरिने सबै विवरण गोप्य भएकाले निर्धाक्कसँग गणकले सोधेको प्रश्नको जवाफ दिइदिइन प्रजिअ पोखरेलले आग्रह गर्नुभयो ।

गणकहरुले फिल्डमा भरेको फारम जिल्ला जनगणना कार्यालयले मंसिर १० देखि १४ गतेसम्म संकलन गरिसक्नेछन् । जिल्लाको ६ वटै स्थानीय जनगणना कार्यालय मंसिर १५ गते बन्द हुने छ । मंसिर १९ गतेदेखि २८ गतेसम्म जिल्ला जनगणना कार्यालय काभ्रेले फिल्डमा भरिएका फारम संकलन गरेर तथ्याङ्क विभागमा पठाउने छ ।

सबैभन्दा बढी सुपरीवेक्षक पनौती नगरपालिकामा १७ जना छन् । त्यहाँ ६७ जना गणक रहेका छन् । सबैभन्दा बढी गणक बनेपा नगरपालिकामा ८९ जना रहेका छन् भने सुुपरीवेक्षक १५ जना रहेका छन् । धुलिखेल नगरपालिकामा ११ जना सुपरीवेक्षक र ४६ जना गणक, बेथानचोक गाउँपालिकामा ५ जना सुपरीवेक्षक र २० जना गणक, पाँचखाल नगरपालिकामा १४ जना सुपरीवेक्षक र ४९ जना गणक रहेका छन् ।

त्यस्तै मण्डनदेउपुर नगरपालिकामा १२ जना सुपरीवेक्षक र ४४ जना गणक, भुम्लु गाउँपालिकामा ७ जना सुपरीवेक्षक र २७ जना गणक, चौरीदेउराली गाउँपालिकामा ८ जना सुपरीवेक्षक र २६ जना गणक, रोशी गाउँपालिकामा १० जना सुपरीवेक्षक र ३३ जना गणक, महाभारत गाउँपालिकामा ५ जना सुपरीवेक्षक र १६ जना गणक, खानीखोला गाउँपालिकामा ५ जना सुपरीवेक्षक र १३ जना गणक, तेमाल गाउँपालिकामा ७ जना सुपरीवेक्षक र २८ जना गणक तथा नमोबुद्ध नगरपालिकामा १० जना सुपरीवेक्षक र ३९ जना गणक रहेको जिल्ला जनगणना कार्यालयले जनाएको छ ।