एमाले काभ्रेले वडा अधिवेशन सकाएको छ । पालिका अधिवेशन अन्तिम चरणमा पुर्याएको छ । कांग्रेसले पनि काभ्रेमा वडा र पालिका अधिवेशन सकाईसकेको छ ।
दुई ठूला पार्टीले मुलुकको नयाँ राज्य संरचनापछि पहिलो पटक वडा र पालिका अधिवेशन सकाएका हुन् । दुबै पार्टीले ऐतिहासिक अधिवेशनको नारा दिएका थिए । एमालेले पहिलो वडा र पालिका अधिवेशन भनेको थियो । कांग्रेसले चाहिँ १४ औं अधिवेशनको ब्यानरमा अधिवेशन सकाएको छ ।
काभ्रेको १३ वटा स्थानीय तह मध्ये रोशी गाउँपालिका बाहेक सबै स्थानीय तहमा एमालेले पालिका अधिवेशन सकाएको हो । रोशी गाउँपालिकामा यहि कार्तिक २४ अधिवेशन तोकिएको छ ।
हालसम्म सकिएको अधिवेशन हेर्दा कुनै पनि पालिकामा एमाले र कांग्रेसको नेतृत्व महिला र दलित समुदायले गरेका छैनन् । एमालेको महिला चारवटा पालिकाको पदाधिकारीमा भने अटाएका छन् । त्यो पनि सहसचिबमा मात्रै ।
एमालेको धुलिखेल नगर कमिटीमा चिनीमाया तामाङ, बनेपामा रोशनी उपाध्याय, नमोबुद्ध नगरपालिकामा सम्झना तामाङ र भुम्लु गाउँपालिकामा उर्मिला बराईली सहसचिबमा निर्विरोध निर्वाचित हुनुभएको छ ।
१२ वटा पालिकामा अधिवेशन सकाएको एमालेले नेतृत्वमा एक जना पनि दलित समुदायका ब्यक्ति ल्याएन । पदाधिकारीमा भने गाउँपालिका कमिटीको सहसचिबमा उर्मिला बराईली एक जना दलित समुदायबाट निर्विरोध निर्वाचित हुनुभएको छ ।
उसो त एक महिना अघि नेपाली कांग्रेसले पनि वडा र पालिका अधिवेशन सकाएको छ । त्यो पार्टीको नेतृत्वमा पनि दलित समुदायको उपस्थिति शुन्य छ । एमालेले कांग्रेसलाई सामान्ती, पूँजीपति बर्गको प्रतिनिधित्व गर्ने पार्टीकै रूपमा अर्थ्याउने गरेको छ ।
तर दलित, महिला र श्रमजीवी बर्गको प्रतिनिधित्व गर्ने पार्टी भनेर नथाक्ने एमालेले पनि आफ्नो कुनै पनि वडा र पालिकाबाट नेतृत्वमा दलित समुदायलाई ल्याउन नसक्नुलाई भने गम्भीर ढंगबाट हेर्नु पर्ने हुन्छ । एमाले जिल्ला कमिटी सदस्य सागर मिजार वडा र पालिका अधिवेशनबाट पार्टीको नेतृत्वमा दलित समुदायको सहभागिता नहुनुमा पार्टीको मुल नेतृत्वले गम्भीर ढंगबाट हेर्नु पर्ने बताउनुहुन्छ ।
‘दलित समुदायका ब्यक्ति पनि पार्टी चलाउन सक्षम छन् भन्ने मान्यता जिल्ला नेतृत्वमै स्थापित गर्न आवश्यक छ । अहिलेको अवस्थालाई हेर्दा चाहिँ चिन्ताजनक छन् । यसलाई आगामी दिनमा नेतृत्व गर्ने जिम्मावारी दलित समुदायलाई दिईनु पर्छ भनेर अझै ठूलो संघर्ष गर्नु पर्ने अवस्था सिर्जना भएको छ । एमाले जिल्ला कमिटी सदस्य मिजारले भन्नुभयो ।’
एमालेले जिल्लाको १३५ वटै वडामा अधिवेशन सकिएको छ । प्राप्त विवरण अनुसार वडा कमिटीको नेतृत्वमा पनि दलित समुदायका ब्यक्ति आएका छैनन् । वडा कमिटीमा महिला भने निर्विरोध निर्वाचित हुनुभएका छन् ।
बनेपा नगरपालिकाको वडा नम्बर ५ मा समिता थापा, वडा नम्बर १४ निर्मला तामाङ र रोशी गाउँपालिका वडा नम्बर १२ मा प्रतिभा रायमाझी एमालेको वडा कमिटीमा निर्विरोध निर्वाचित हुनुभएको हो ।
एमाले र नेपाली कांग्रेसले सम्पन्न गरेका वडा अनि पालिका अधिवेशनलाई केलाउँदा दलित समुदायलाई केबल भोट बैंकको रूपमा मात्रै लिएको प्रष्ट हुन्छ । नेपाली कांग्रेसको वडा समितिमा एक जना पनि दलित समुदायबाट नेतृत्व नरहेको जिल्ला सचिब दिनेश लामाले जानकारी दिनुभयो ।
यी दुबै पार्टीको विधानले नेतृत्वमै दलित ल्याउनु पर्छ भनेर किटान गरेको छैन् । तर कांग्रेसको हरेक समितिमा क्रियाशील सदस्य संख्याको आधारमा दलित समुदायलाई राख्नु पर्ने उल्लेख गरिएको जिल्ला सचिब लामाले बताउनुभयो ।
‘दलित समुदायमा अझै पनि राजनीति प्रतिको चेतना निकै कम छ । वडा र पालिका अधिवेशनबाट एक जना पनि दलित समुदायबाट नेतृत्वमा नआउनुले पनि यो कुरालाई प्रष्ट पार्छ । ब्यापक मात्रामा दलित समुदायभित्र राजनीतिक जागरण ल्याउन आवश्यक छ । दलित समुदायको प्रतिनिधिमूलक सहभागीता त हुन्छ । तर नेतृत्वमा उहाँहरू नआउँदा निर्णय गर्ने तहमा भुमिका कमजोर हुन्छ । यसलाई बढाउन आवश्यक छ, जिल्ला सचिब लामाले भन्नुभयो ।’
Facebook Comments