बेथानचोक-६ का वडाध्यक्षले बेवास्ता गरे, जनताले कुटो, कुदोलोले नै खनेर सिउरानीसम्म बस पुर्याए

धेरैलाइ लागेको थियो, स्थानीय तहमा जनप्रतिनिधि आएपछि गाउँ घरका समस्या छिटै समाधान हुन्छ ।

तर काभ्रेको बेथानचोक गाउँपालिका वडा नम्बर ६ सिउरानीका जनाताले भने जनप्रतिनिधिको कार्यकाल सकिन लाग्दा पनि कुनै अनुभुति गर्न पाएका छैनन् । गाउँमै गाडी पुर्याउने उनीहरूको चाहना वडा कार्यालयले कहिल्यै पुरा गरेन ।

महिनौंसम्म वडा कार्यालयबाट डोजर आउने आशमा त्यहाँका स्थानीय बसे । स्थानीयले गाउँसम्म गाडी पुग्ने बाटो फराकिलो बनाईदिन सके र जाने जति सबै प्रक्रिया गरे । २०७७ सालको माघ महिनामा वडाध्यक्ष विष्णु तामाङलाई सिउरानी मै लगेर बाटो देखाए । स्थानीयले सडक नहुँदा खेपिरहेको दुःख सुनाए । स्थानीयको अगाडि वडाध्यक्ष तामाङले सडक फराकिलो बनाउन डोजर पठाईदिने बाचा पनि गर्नुभयो ।

स्थानीयले २०७७ साल फागुन १८ गते पनि कुटो कोदालो लिएरै सडक फराकिलो बनाउन लागिपरेका थिए । त्यो कुरा वडा कार्यालयमा पुग्यो । वडाले फेरी डोजर पठाउँछु भन्यो । स्थानीयले काम रोके ।

वडाले डोजर पठाउने आशमा बसेका स्थानीय त्यो बेला निराश भए । जति बेला गाउँमा डोजर त पुग्यो । तर बाटो फराकिलो होईन दसैंमा साना गाडीलाई सजिलो होस भनेर खाल्डा खुल्डी पञ्छाएर फर्कियो । सिउरानीमा गत असोज २२ गते डोजर पुगेको थियो ।

सिउरानीमा २२-२३ घर धुरी रहेको एउटा बस्ती छ ।गाउँमाथिको छाप डाँडासम्म बस पुगेको लगभग १० महिना पुग्नै लाग्यो । सिउरानीसम्म बस पुर्याउने स्थानीयको तीव्र ईच्छा वडा कार्यालयले बेवास्ता गरेपछि स्थानीयहरू फेरी कुटो, कोदालो लिएर जुटे ।

प्रत्येक घरका एक जना अनिवार्य उपस्थित भए । यसको नेतृत्व कुमार थिङले गर्नुभयो । डोजरले केहि घण्टामै सकाउने काम २२-२३ जनाको पाखुरालाई दुई दिन लाग्यो । बिहानदेखि साँझसम्मै । आफ्नो सबै काम छोडेर सडक फराकिलो बनाउन कस्सिए सिउरानीका स्थानीय । छाप डाँडासम्म मात्रै चल्दै आएको बसलाई पुर्याए सिउरानीसम्मै । महिला, पुरुष र बृद्धाबृद्ध सबै जुटेका छन् ।

‘हामी यति हैरानी भयौ की म तपाईलाई शब्दमा वर्णन गर्दै सक्दिन । पटक पकट वडा कार्यालय धायौ । वडाध्यक्षलाई गाउँमै ल्याएर बाटोको अवस्था देखायौ । उहाँले त्यत्रा जनतासामु प्रतिबद्धता जनाउनुभयो । झन आश जाग्यो । तर यतिका महिनासम्म पनि वडाध्यक्षले सडक फराकिलो बनाउन चासो नदिएपछि हामीले कुटो, कोदालो, बेल्चा र गैंची लिएर प्रतिबद्धता गर्यौ की जसरी पनि गाउँमा बस पुर्याउने । नभन्दै हामी सफल भयौं । स्थानीय अगुवा कुमार थिङले भन्नुभयो ।’

स्थानीयले सारा काम छाडेर कुटो, कोदालो बोकेर सडक फराकिलो पार्दै गरेको फोटो, भिडियो सार्वजनिक हुँदा पनि वडाध्यक्ष विष्णु तामाङ भने सिउरानीकै जनाताको दोष देख्नुहुन्छ । मिलिजुली खबरसंग कुरा गर्दै वडाध्यक्ष तामाङले सहि समयमा आफुलाई त्यहाँका नागरिकले जानकारी नगराएर गल्ती गरेको बताउनुभयो ।

‘गाउँ पुगेको डोजरले बाटो फराकिलो पार्न नमानेको हो भने मलाई त्यहिबेला फोन गरेको भए समस्या समाधान हुन्थ्यो । त्यो बेला उहाँहरूले फोन गर्नु भएन । दोषी उहाँहरू नै हो । फेरी हिजोदेखि कुटो, कोदालो बोकेर सडक फराकिलो पार्दै हुनुहुन्छ भन्ने सुनेको छु । वडाध्यक्ष तामाङले भन्नुभयो ।’

वडाध्यक्ष ज्यू, सिउरानीका जनताले सडक फराकिलो मात्रै होईन बस नै गुडाईसके । अझै पनि मोड साँघुरो नै रहेको चालकले बताएका छन् । त्यो काँटछाँट गर्न डोजर पठाएर थोरै भए पनि जस लिनुस् । जनतालाई दोष दिएर जनप्रतिनिधि उम्कन मिल्छ र ?

स्थानीय अगुवा कुमार थिङका अनुसार आज पनि मोडलाई फराकिलो पार्ने काम भैसकेको छ । ‘हामी ज्यादै खुशी छौँ । आफ्नै बल र पसिना बगाएर बस गाउँसम्म पुर्याउन पायौं । वडाध्यक्षको आश्वासन धेरै पटक आयो । तर पुरा भएन । बसका चालकले मोड नपुगेको भन्नु भएको छ । आज मोडलाई थप फराकिलो बनाउन गाउँका हामी सबै लागि परेका छौं । थिङले भन्नुभयो ।’

बनेपाबाट रेम्बो यातायात प्रालिले सिउरानीसम्म बस चलाउन सुरू गरिसकेको छ । यस अघि छाप डाँडासम्म मात्रै बस चल्दै आएको थियो ।