काभ्रेपलाञ्चोकको रोशी गाउँपालिका वडा नम्बर ११ जुगेपानी पौवामा रहेको चिज उत्पादन केन्द्रले दुर्गमका किसानलाई निकै सजिलो भएको छ ।
चिज उत्पादन केन्द्र २०२७ सालमा साविकको भिमखोरी गाविस वडा नम्बर १ जुगेपानी पौवामा दूग्ध विकास संस्थानले सञ्चालनमा ल्याएको थियो । २०५० सालदेखि २०६५ सालसम्म १५ बर्ष उत्पादन केन्द्र बन्द भएको थियो । अहिले पुनः सञ्चालनमा आएपछि किसानहरु हर्षित भएका छन् ।
बन्द भएको चिज उत्पादन केन्द्र सञ्चालनमा आएपछि गाउँमा भैसी पाल्नेको संख्या समेत बृद्धि भएको स्थानीय सुरेश कर्माचार्यले बताउनुभयो । ‘उत्पादन गरेको दूध त्यत्तिकै खेर जाला भन्ने छैन् । किसानले जति दूध उत्पादन गरेपनि यही केन्द्रले लिन्छ । बन्द हुदाँ किसानहरु धेरै दूखित पनि भए ।
तर अहिले गाउँमा भैँसी पाल्ने किसानको संख्या समेत बढेको छ । पहिलेको जस्तो टाढा टाढासम्म खच्चडलाई बोकाएर लैजानु पर्दैन् । हिउँदो याममा कतिपय किसानको गोठमै गाडी पुग्छ । कर्माचार्यले भन्नुभयो ।’
उत्पादन केन्द्रमा भिमखोरीको कातारचे, केरावारी, पौवा, सोरे, छिमेकी जिल्ला सिन्धुलीको घ्याङलेख गाउँपालिकाका विभिन्न वडाहरुबाट सहकारीले दूध संकलन गरेर ल्याउने गरेका छन् । काभ्रे र सिन्धुलीको गरेर ८ वटा सहकारीले दैनिक दूध संकलन गरेर यो केन्द्रमा ल्याउने गरेको त्यहाँ कार्यरत कर्मचारी जीवन श्रेष्ठले जानकारी दिनुभयो ।
उहाँका अनुसार दैनिक रुपमा ७५० सयदेखि ८०० लिटरसम्म दूध जम्मा हुने गरेको छ । मासिक १५ लाखको हाराहारीमा कारोवार हुने केन्द्रले जनाएको छ । चिज उत्पादन केन्द्रमा संकलन भएको दूधबाट चिज, मखन, पनिर, नौनी लगायतका दूधजन्य परिकार बन्ने गरेको छ ।
यसरी उत्पादन भएका सामग्री काठमाडौंस्थित केन्द्रीय कार्यालय लौनचौरमा लगेर विक्री गर्ने गरेको चिज उत्पादन केन्द्रमा कार्यरत कर्मचारी जीवन श्रेष्ठले बताउनुभयो ।
भिमखोरीको उच्च पहाडी भूभागमा पहिले यातायातको साधन नचल्दा स्थानीयले खच्चडलाई बोकाएर दूध चिज उत्पादन केन्द्रसम्म ल्याउने गरेका छन् । अझै पनि केहि ठाउँबाट भने खच्चडलाई नै बोकाएर किसान र सहकारीले दूध ल्याउने गरेको कर्मचारी श्रेष्ठले बताउनुभयो ।
‘बर्खायाम अझै पनि यातायातको समस्या छ । पहिले त सबै दूध खच्चडलाई नै बोकाएर यहाँसम्म सहकारी र किसानले ल्याउने गर्थे । तर अहिले धेरै जसो त गाडीबाट ढुवानी हुने गरेको छ । गाडी आएपछि धेरै सजिलो भएको छ । श्रेष्ठले भन्नुभयो ।’
Facebook Comments