काभ्रेको मण्डनदेउपुर नगरपालिकाको वडा नम्बर १० मा बन्ने चण्डेनीमण्डन स्वास्थ्य चौकीको नयाँ भवनको शिलान्यास गरिएको छ ।
स्वास्थ्य चौकी भवनको शिलान्यास स्वास्थ्य राज्य मन्त्री उमेश श्रेष्ठले आज गर्नु भएको हो । पहिलेको स्वास्थ्य चौकी भवन २०७२ साल बैशाख १२ गतेको भुकम्प र त्यस यताको पराकम्पले क्षति ग्रस्त बनेको थियो ।
स्वास्थ्य चौकी भवन भारत सरकारको आर्थिक अनुदान सहयोगमा निर्माण हुन लागेको हो । हालको स्वास्थ्य चौकी रहेको कटहरेचौरमै नयाँ भवन निर्माण सुरू गरिएको छ ।
स्वास्थ्य चौकी भवन २ करोड, ८२ लाख, ६५ हजार, १२१ रूपैयाँ लागतमा निर्माण हुनेछ । बढीमा १८ महिनाभित्र निर्माण पुरा भैसक्ने वडाध्यक्ष बिष्णुमणि नेपालले जानकारी दिनुभयो ।
स्वास्थ्य चौकी निर्माणपछि वडाबासीलाई स्वास्थ्य सेवा प्राप्त गर्न थप सहयोग हुने वडा सदस्य एवं नगर कार्यपालिका सदस्य गिता नेपालले बताउनुभयो ।
निर्माण कम्पनी कम्पनीका प्रमुख राजेश गौतमले सबैको सहयोग मिल्यो भने भवन २०७९ असारसम्म सम्पन्न गरेर बुझाईसक्ने प्रतिबद्धता जनाउनु भयो । अहिलेसम्म आफ्नो कम्पनीले म्याद थप गरेर काम नगरेको स्मरण गर्दै यो स्वास्थ्य चौकी भवन पनि तोकिएको समयभन्दा अघि नै सकाउने बताउनुभयो ।
कार्यक्रममा काभ्रे जिल्लामा ११ वटा नेपाल सरकार र १२ वटा स्वास्थ्य चौकी भारत सरकारको आर्थिक सहयोगमा निर्माण भैरहेको जिल्ला आयोजना कार्यान्वयन ईकाई (भवन) काभ्रेका प्रमुख सन्तोष निरौलाले जानकारी दिनुभयो । समयमै यो स्वास्थ्य चौकी निर्माण सम्पन्न हुनेमा आफु विश्वस्त रहेको उहाँले बताउनुभयो ।
प्रमुख प्रशासकीय अधिकृत प्रणराज न्यौपानेले नगरपालिकाको थोरै मात्रै सरकारी भवन पक्की रहेको भन्दै चण्डेनीमण्डन स्वास्थ्य चौकीको गुणस्तरीय भवन निर्माण हुनेमा नगरपालिका ढुक्क रहेको बताउनुभयो । स्थानीयलाई बेला बेलामा अनुगमन गर्न उहाँले आग्रह गर्नुभयो ।
कांग्रेस काभ्रेका उपसभापति अच्युत पौडेलले नगर अस्पताल निर्माणमा जस्तो ढिला सुस्ती र अनियमितता नहोस् भन्नका लागि खबरदारी गर्न आवश्यक रहेको बताउनुभयो ।
पूर्व गृह सचिब एवं प्रधानमन्त्री शेर बहादुर देउवाका प्रशासनिक सल्लाहकार जनार्दन नेपालले भवनको गुणस्तरीयताका लागि चनाखो हुन आग्रह गर्नुभयो । हरेक ब्यक्तिले चासो राखे मात्रै गुणस्तरीय भवन भन्ने उहाँको भनाई थियो ।
Facebook Comments