कांग्रेस काभ्रेले कुनै पनि स्थानीय तहमा सर्वसम्मत नेतृत्व नपाउने

भदौं ५ र ६ गते वडा अधिवेशन सकाएको काभ्रे कांग्रेसले भोली स्थानीय तहको अधिवेशन गर्दैछ । क्रियाशील सदस्यको विवाद नसुल्टिँदा अधिवेशनको संशोधन मिति कुरेको काभ्रे कांग्रेसले स्थानीय तहमा पनि सर्वसम्मत नेतृत्व नपाउने निश्चित भएको छ ।

काभ्रेको सबैभन्दा पहिलो बनेपा नगरपालिकामा नगरसभापतिका लागि शान्ति रत्न शाक्य र महेश कर्माचार्य बीच प्रतिस्पर्धा हुनेछ । धुलिखेल नगरपालिकामा अन्य ठाउँको भन्दा बढी प्रतिस्पर्धीको नाम चर्चामा छ । मञ्जु कुमार कोजु, बिदुर बस्नेत, बिनोद गौतम, बिमल ब्याञ्जुको नाम नगरसभा पतिका लागि चर्चामा छ ।

पाँचखाल नगरपालिकामा गणेश अधिकारी र सञ्जय लामा बीच कडा प्रतिस्पर्धा हुने देखिएको छ । यद्यपि त्यहाँ हेमा लामा र सुन्दर लामाको नाम पनि नगरसभा पतिको चर्चामा छ । मण्डनदेउपुर नगरपालिकामा काश्यप प्रसाद पौडेल र रामहरि सापकोटा बीच प्रतिस्पर्धा हुनेछ ।

नमोबुद्ध नगरपालिकामा कुन्साङ लामा र दिनेश भुर्तेलबीच प्रतिस्पर्धा हुनेछ । कुन्साङका लागि दिनेश यो पटक निकै भारी पर्ने देखिएका छन् । त्यस्तै पनौती नगरपालिकामा रामशरण भण्डारी र भोला थापाबीच प्रतिस्पर्धा हुने आंकलन गरिएको थियो । तर थापा वडामै पराजित भएपछि मधु आचार्य समूह अर्कै उम्मेदवारको खोजीमा छ ।

जिल्लाको सात वटा गाउँपालिकामा पनि कांग्रेसको गुटगत प्रतिस्पर्धा हुनेछ । काभ्रेमा शिव हुमागाईं र मधु आचार्य समूह फ्रन्ट लाईनमा देखिपनि त्यो भित्र केन्द्रीय नेताका ब्यक्तिगत गुट समेत प्रष्दै देखिन्छ । हुमागाई कृष्ण प्रसाद सिटौलाको असलि मान्छे हुन् । उनलाई देउवा प्यालनका तीर्थ लामा, तीर्थ पसखला जस्तो नेताले साथ दिनेछन् ।

आचार्य रामचन्द्र पौडेलका विश्वासिला पात्र हुन् । आचार्यलाई गणेश लामा, प्रकाशमान सिंह लगायतका नेताहरूको समूहले साथ दिएको छ । कांग्रेस काभ्रेमा केन्द्रको गुटगत राजनीति निकै झाङ्गिएको छ ।