नेकपा एस काभ्रेको प्रथम सचिवालय बैठक: यी हुन् महत्वपूर्ण निर्णय

नेकपा (एकीकृत समाजवादी) काभ्रेको प्रथम सचिवालय बैठक सम्पन्न भएको छ । आज बनेपामा रहेको पार्टी कार्यालयमा बसेको पहिलो सचिवालय बैठकले विभिन्न निर्णयहरू गरेको छ ।

पार्टी जिल्ला कमिटी अध्यक्ष टोक बहादुर वाईबाको अध्यक्षतामा बसेको सचिवालय बैठकले जिल्ला भर भैरहेको पार्टीको संगठन विस्तारको समीक्षा गर्दै थप सशक्त रुपमा अघि बढ्ने निर्णय गरेको छ । त्यस्तै बैठकले सचिवालयलाई पूर्णता दिएको छ । बैठकले सचिवालयमा २९ जना सदस्य थप गर्ने निर्णय गरेको छ ।

यस्तै जिल्ला कमिटी सदस्य पनि थप गरेको छ । १८ जना जिल्ला कमिटी सदस्य थप गर्ने निर्णय गरेको जिल्ला पार्टी उपाध्यक्ष बसुन्धरा हुमागाईले बताउनुभयो । बैठकले काभ्रे-काठमाडौं सम्पर्क मञ्चको भेला तथा संगठन विस्तार गर्ने निर्णय पनि गरेको छ ।

यसैगरी बैठकले यहि असोज महिनाभित्र भेला गर्न बाँकी सबै स्थानीय तहहरूमा भेला सम्पन्न गरी सक्ने निर्णय गरेको छ । त्यसैगरी सदस्यता फारम पनि साथसाथै भर्न सबै मातहातका कमिटीलाई निर्देशन दिने निर्णय गरेको छ । बैठकले यहि असोज २३ गते बनेपामा रहेको जिल्ला पार्टी कार्यालय उद्घाटन गर्ने र शुभकामना आदान प्रदान गर्ने निर्णय गरेको छ ।

बैठकले जिल्ला पार्टी उपाध्यक्ष एवं प्रदेश सांसद बसुन्धरा हुमागाईलाई नेकपा (एकीकृत समाजवादी) बागमती प्रदेश संसदीय दलको सचेतकमा चयन हुनुभएकोमा बधाई तथा कार्यकाल सफलताको शुभकामना दिएको छ ।