नेकपा (ए.स) बागमती प्रदेशका सचेतक हुमागाईलाई आफ्नो नगर पनौतीमा भब्य स्वागत र सम्मान

नेकपा (एकीकृत समाजवादी) बागमती प्रदेश संसदीय दलका सचेतक बसुन्धरा हुमागाईलाई आफ्नो नगर पनौतीमा भब्य स्वागत गरिएको छ । नेकपा (एकीकृत समाजवादी) पनौती नगर कमिटीले सचेतक हुमागाईलाई स्वागत र सम्मान गरेको हो ।

दुईदिन अघि हेटौँडामा बसेको नेकपा (एकीकृत समाजवादी) संसदीय दलको बैठकले सांसद हुमागाईलाई सचेतकमा चयन गरेको थियो । सांसद हुमागाई काभ्रे संघीय निर्वाचन क्षेत्र नम्बर २ अन्तर्गत प्रदेश निर्वाचन क्षेत्र नम्बर २ बाट निर्वाचित हुनु भएको थियो ।

तत्कालीन एमालेबाट निर्वाचित भएपनि फुटपछि सांसद हुमागाईले नेकपा (एकीकृत समाजवादी) मा सनाखत गर्नुभएको थियो । संघीय निर्वाचन क्षेत्र नम्बर २ अन्तर्गत प्रदेश १ र २ का दुबै जना सांसदले नेकपा (एकीकृत समाजवादी) मा सनाखत गर्नुभएको थियो । निर्वाचन क्षेत्र नम्बर २ पूर्व मन्त्री एवं सांसद गोकुल बाँस्कोटाको निर्वाचन क्षेत्र पनि हो ।

पनौती नगरपालिकाबाट एक जना वडाध्यक्ष, कार्यपालिका सदस्य १ जना र तीन जना वडा सदस्य गरी ५ जनाले नेकपा (एकीकृत समाजवादी) पार्टीमा सनाखत गरेका छन् । काभ्रेमा सबैभन्दा बढी निर्वाचन क्षेत्र नम्बर २ मै एमाले जनप्रतिनिधिले नेकपा (एकीकृत समाजवादी) दल रोजेका छन् ।