काभ्रेको मण्डनदेउपुर नगरपालिकाका नगरप्रमुख टोक बहादुर वाईबा बाढी प्रभावितको गुनासो सुन्न प्रभावित क्षेत्रमै पुग्नुभएको छ । नगरप्रमुख वाईबाले आज वडा नम्बर ६ को सिपाघाटमा पुगेर प्रभावितलाई भेट्नु भएको हो ।
२१ गते ढाँड खोलामा आएको बाढीले खोला आसपास सयौँ हेक्टर खेती योग्य जमिन बगरमा परिणत गरेको छ । त्यस्तै खानेपानीको पाईप र सिँचाई कुलो बगाएको स्थानीयले बताए । नगरप्रमुख वाईबाले क्षति ग्रस्त खानेपानी र सिँचाई कुलो सूचारूका लागि नगरपालिकाका इन्जिनियर र स्काभेटर पठाउने बताउनुभयो ।
नगरप्रमुख वाईबाले खोला नियन्त्रणका लागि मेलम्ची नगरपालिका र मण्डनदेउपुर नगरपालिकाको संयुक्त टोली बनाएर काम थाल्ने बताउनुभयो । ‘दुबै तर्फबाट खोला अतिक्रमण भएको छ । खोला बग्ने ठाउँमा निकै साँघुरो भएको छ । यसलाई दुबै तर्फको नगरपालिकाका प्रतिनिधी बसेर नाप, नक्साको आधारमा नियन्त्रण गर्न आवश्यक छ, नगरप्रमुख वाईबाले भन्नुभयो ।
वडा नम्बर ६ का वडाध्यक्ष एवं नगरपालिकाका प्रवक्ता डिल्ली प्रसाद आचार्यले खानेपानी र सिँचाई कुल जति सक्दो छिटो सञ्चालनमा ल्याउन काम गर्ने बताउनुभयो । ‘ढाँड खोला यो बर्षपनि धेरै क्षति पुर्याएको छ । धान खेत बगाएको छ । त्यसको पनि संरक्षण गर्नु नै छ । तर सबै भन्दा पहिला खानेपानी र सिँचाईलाई अस्थायी रूपमै भए पनि सूचारू गर्न आवश्यक छ, वडा आचार्यले भन्नुभयो ।’
स्थानीय रामप्रसाद नेपालले २०५८ सालमा जस्तै यो पटक पनि ढाँड खोलामा बाढी आएको बताउनुभयो । ‘मेरो ३ रोपनी खेत थियो । यो लालपूर्जा भएकै जमिन हो । खेतको नाममा यति थियो । सबै बगायो । यो खोलामा बाढी त बर्षेनी आउँथ्यो । तर यस्तो खालको बाढी २०५८ सालमा आएको मलाई सम्झना छ, रामप्रसादले भन्नुभयो ।’
Facebook Comments