पनौती नगरपालिकामा चालु आर्थिक वर्षका विकास योजना पुस मसान्तभित्रै सकाईने

काभ्रेको पनौती नगरपालिकाले चालु आर्थिक वर्षमा सञ्चालन हुने बिभिन्न विकास याेजना पुस मसान्तभित्रै सकाउन सबैलाई निर्देशन दिनुभएको छ । मंगलबार भएको छलफलमा नगरप्रमुख भिम न्यौपानेले पुस मसान्तभित्रै गुणस्तरीय काम सकाउन निर्देशन दिनुभएको हो ।

नगरपालिकाले चालु आर्थिक वर्षमा कार्यान्वन गर्ने पहिलाे चरणको सुचना प्रकाशित भएका १६ वटा याेजना संग सम्बन्धित वडा अध्यक्ष, निर्माण ब्यवसायी, याेजना शाखाका कर्मचारी वृहत छलफल गरेको हो ।छलफलबाट अबको सात दिन भित्र याेजना संझाैता गरिसक्ने र यहि पुस मसान्त भित्र गुणस्तरीय कार्य सम्पन्न गरि हस्तान्तरण गर्ने निष्कर्ष निकालिएको नगरप्रमुख न्यौपानेले बताउनुभयो ।

यो बर्ष पनौतीमा १२ वर्षे मकर मेला लाग्ने र स्थानीय तहको निर्वाचन समेत यसै आर्थिक वर्षमा हुने भएकाले पनि नगरपालिकाले विकास निर्माणका काम छिटो सुरू गर्न तदारुकता देखाएको हो । नगरप्रमुख न्यौपानेले बैठकमा काम गर्ने क्रममा आईपर्ने उल्झनहरू आफुलाई तत्कालै खबर गर्न र समधान पनि तत्कालै गर्न पहल गरिने बताउनुभयो ।