धुलिखेल र खानीखोलामा नेकपा (एकीकृत समाजवादी) र महाभारतमा एमाले शुन्य

काभ्रेको दुईवटा स्थानीय तहमा नेकपा (एकीकृत समाजवादी) मा सनाखत गर्ने एक जना पनि एमाले जनप्रतिनिधि नभएको पाईएको छ । एउटा स्थानीय तहमा भने एमालेका सबै जनप्रतिनिधिले नेकपा (एकीकृत समाजवादी) मा सनाखत गरेका छन् ।

८ वटा वडा रहेको महाभारत गाउँपालिकामा ४ जना जनप्रतिनिधि एमालेबाट निर्वाचित बनेका थिए । जसमा वडा नम्बर ८ का वडाध्यक्ष सहित चारै जनाले नेकपा (एकीकृत समाजवादी) पार्टीमा सनाखत गरेका छन् । महाभारत गाउँपालिकामा एमालेको जनप्रतिनिधि शुन्य भएको छ ।

धुलिखेल नगरपालिकामा निर्वाचन एक जना पनि एमाले जनप्रतिनिधिले नेकपा (एकीकृत समाजवादी) मा सनाखत नगरेका हुन् । २०७४ सालको निर्वाचनमा धुलिखेल नगरपालिकामा प्रमुख, उपप्रमुख र ८ जना वडाध्यक्ष सहित ५६ जना जनप्रतिनिधि एमालेबाट निर्वाचित भएका थिए । धुलिखेल नगरपालिकामा १२ वटा वडा रहेका छ ।

धुलिखेल नगरपालिकामा नेकपा (एकीकृत समाजवादी) पार्टीको संगठन भने विस्तार भै सकेको छ । तर एमालेका एक जना पनि जनप्रतिनिधिले नेकपा (एकीकृत समाजवादी) मा सनाखत नगरेका हुन् । धुलिखेल नगरपालिका एमाले अध्यक्ष अशोक कुमार ब्याञ्जु श्रेष्ठ मेयर रहेको नगरपालिका पनि हो ।

त्यस्तै ७ वडा रहेको खानीखोला गाउँपालिकामा अध्यक्ष, उपाध्यक्ष र ४ जना वडाध्यक्ष सहित २६ जना जनप्रतिनिधि एमालेबाट निर्वाचित बनेका थिए । उनीहरू सबै एमालेमै रहेका छन् । धुलिखेल नगरपालिका र खानीखोला गाउँपालिकाका एमाले जनप्रतिनिधि यसअघि पनि माधव नेपाल समूहको गतिविधिमा सहभागी भएका थिएनन् ।

एमालेले १३ वटा स्थानीय तह मध्ये धुलिखेल, बनेपा, पनौती, नमोबुद्ध, मण्डनदेउपुर नगरपालिका, भुम्लु र खानीखोला गाउँपालिकामा प्रमुख, उपप्रमुख, अध्यक्ष र उपाध्यक्ष सहित विजयी हासिले गरेको थियो ।