धुलिखेल नगरपालिकाका नगरप्रमुख अशोक ब्याञ्जु श्रेष्ठले स्काउटका सदस्यहरूलाई आफ्नो संगठनको भावना र मर्म बुझेर काम गर्न आग्रह गर्नुभएको छ । धुलिखेल नगरका स्काउटहरूको सपथग्रहण कार्यक्रमका प्रमुख अतिथी नगरप्रमुख ब्याञ्जुले निष्ठापूर्वक नगरको हरेक बस्ती बस्तीमा आफ्नो गतिविधि गर्न अनुरोध गर्नुभयो ।
नगर स्काउटको संरक्षक समेत रहनुभएका नगरप्रमुख ब्याञ्जुले कुनै समस्या, अप्ठ्यारो परे नगरपालिका सहयोग गर्ने तयार रहेको बताउनुभयो । नगर स्काउट प्रमुख एवं उपप्रमुख बिमला शर्माले स्काउटमा रहँदा हासिल गरेको ज्ञान र सीप घर गाउँमा अरूलाई पनि सिकाउन सुझाब दिनुभयो ।
धुलिखेल नगर स्काउटका पदाधिकारीलाई सपथ नेपाल स्काउटका प्रमुख एवं केन्द्रीय स्काउट संयोजक लोक बहादुर भण्डारीले गराउनु भएको थियो । स्काउटका नगर सदस्य सचिब माधब प्रसाद शर्माले आवश्यक समन्वय र सहकार्य गरेर नै नगरभित्र स्काउटले क्रियाकलाप गर्दै जाने बताउनुभयो ।
स्काउट धुलिखेल नगर संयोजक सिबी तामाङले सबैसंग हातेमालो गर्दै स्काउटलाई अघि बढाउने बताउनुभयो । कार्यक्रममा स्काउट बागमती प्रदेश सदस्य अजित लामा, पनौती स्काउटका संयोजक मिलन श्रेष्ठ लगायत स्काउटका सदस्यहरू उपस्थित भएका थिए ।
Facebook Comments