ढुक्क हुनुहोस् काभ्रेमा एमाले भन्दा एकीकृत समाजवादी पार्टी बलियो छ-अध्यक्ष वाईबा

नव गठित नेकपा एकिकृत समाजवादी पार्टी काभ्रेका अध्यक्ष टोक बहादुर वाईबाले जिल्लामा आफुहरू बलियो रहेको बताउनु भएको छ । धुलिखेलमा आयोजित अनेरास्ववियू र युवा संघ नेपाल काभ्रेको संयुक्त विस्तारित बैठकलाई सम्बोधन गर्दै अध्यक्ष वाईबाले जिल्लामा आफुहरू बलियो रहेको भन्दै नआत्तिई संगठन विस्तारमा लाग्न निर्देशन दिनुभयो ।

अध्यक्ष वाईबाले पालिका स्तरसम्म नेकपा एकिकृत समाजवादी पार्टीको गतिविधि अघि बढाउन युवा र विद्यार्थीलाई निर्देशन दिनुभयो । ‘हामीले फेरी एकपटक तत्कालीन एमालेले गरेका अनैतिक र अवैधानिक गतिविधि रोक्न गाउँ गाउँमा संगठन विस्तार गर्न आवश्यक छ । हामीसंग पुरानो र अनुभवि नेताहरू हुनुहुन्छ । एमालेले बिगारेका र भुलभुलैयामा राखेको सत्य तथ्य जनतालाई जानकारी गराउँदै संगठीत गराउ, कार्यक्रमहरू ठाउँ ठाउँमा राखौं, अध्यक्ष वाईबाले भन्नुभयो ।’

अध्यक्ष वाईबाले जिल्लामा एमाले र कांग्रेसलाई टक्कर दिन आफुहरू सक्षम रहेको दाबी गर्नुभयो । ‘तपाईहरू घर घरमा पुग्नुस् । संगठीत गर्नुस् । आफ्नो विचार सुनाउनुस् । जनतालार्ई सम्झाउनुस् । कयौँ मानिसहरू नबुझेर एमालेलाई साथ दिईरहेका छन् । उहाँहरूलाई हाम्रो पार्टीमा समाहित गराउँनुस्, अध्यक्ष वाईबाले भन्नुभयो ।’

काभ्रेमा गोकुल बाँस्कोटा प्रवृत्तिको अन्त्य गर्न जरूरी रहेको अध्यक्ष वाईबाको भनाई छ । ‘ गोकुल बाँस्कोटाको समूहले जिल्लामा भ्रमको खेती गरिरहेको छ । यसलाई चिर्दै हामी अघि बढ्नु पर्ने छ । भ्रममा नपर्नु होस्, अध्यक्ष वाईबाले भन्नुभयो ‘उल्टो काम गर्नेको विरूद्ध ठाउँ ठाउँमा भण्डाफोर गर्न आवश्यक छ ।’

अध्यक्ष वाईबाले जिल्लामा एमालेभित्र ठेकेदारी प्रथा रहेको बताउनुभयो । एमाले काभ्रेका उपाध्यक्ष अशोक कुमार ब्याञ्जु श्रेष्ठलाई स्वघोषित अध्यक्षको संज्ञा दिँदै वडामा आफ्नै पार्टीका उम्मेदवारलाई हराएर मेयर पद साटेको समेत आरोप लगाउनुभयो । ‘जसले हिजो निर्वाचनमा आफ्नै पार्टीका उम्मेदवारलाई पराजित गराएर आफ्नो पद साट्नेसम्मको गतिविधि गरे आज उनीहरूले एमाले पार्टी कसरी चलाउलान्, अध्यक्ष वाईबाले भन्नुभयो ।