काभ्रेमा नयाँ ब्यानर सहित माधब नेपाल नेतृत्वको एकिकृत समाजवादी पार्टीको गतिविधि सुरू

काभ्रेमा नयाँ ब्यानर सहित माधब नेपालले नेतृत्व गरेको नेकपा एकिकृत समाजवादी पार्टीको गतिविधि सुरू भएको छ । धुलिखेलमा जारी युवा संघ नेपाल र अनेरास्ववियूको संयूक्त विस्तारित बैठकको मञ्चमा नयाँ ब्यानरको प्रयोग गरिएको हो ।

यसअघि एमालेकै ब्यानरमा कार्यक्रम हुँदै आएको थियो । तर निर्वाचन आयोगमा माधब नेपालले नयाँ पार्टी दर्ताका लागि निवेदन दिएपछि काभ्रेमा नयाँ ब्यानर सहित कार्यक्रम थालिनी गरिएको हो । पहिले एमाले पार्टीको सूर्य चिन्ह अंकित झण्डा सहितको ब्यानर राखिदै आएको थियो । तर आजको कार्यक्रममा पुष्षलाल श्रेष्ठ, मण्दन भण्डारी र मनमोहन अधिकारीको फोटो राखिएको छ ।

कार्यक्रममा तत्कालीन एमालेको ९ जिल्ला अधिवेशनबाट निर्वाचित अध्यक्ष टोक बहादुर वाईबा, सांसद लक्ष्मण लम्साल, नेताहरू दिपक गौतम, समिप त्रिपाठी, विजय लामा, प्रदिप लामा, भेषराज शाह, दया सागर श्रेष्ठ लगायतका नेताहरू सहभागी छन् ।

कार्यक्रममा युवा र विद्यार्थीलाई सम्बोधन गर्दै सांसद लम्सालले भ्रष्टाचारका विषयलाई शसक्त उठाउन आग्रह गर्नुभयो । नयाँ ढंगले अब पार्टी संगठन विस्तार गर्न आवश्यक रहेको भन्दै सांसद लम्सालले अनुशासित भएर आफ्नो संगठनलाई गाउँ गाउँसम्म लैजान युवा र विद्यार्थीको महत्वपूर्ण भूमिका रहेको भन्दै त्यसै अनुरुप अघि बढ्न आग्रह गर्नुभयो ।

जिल्ला अध्यक्ष टोक बहादुर वाईबाले तत्कालीन एमाले पार्टी विधि र पद्धति अनुसार नचलेकै कारण नयाँ पार्टी गठन गर्नुको विकल्प नरहेको बताउनुभयो । नयाँ पार्टीको सोच र विचारलाई आम नागरिक समक्ष लैजान युवा र विद्यार्थीलाई अध्यक्ष वाईबाले निर्देशन दियो ।

केन्द्रमा केपी ओली र काभ्रेमा गोकुल बाँस्कोटा प्रवृत्तिको अन्त्य गर्न जरूरी रहेको अध्यक्ष वाईबाको भनाई छ । ‘यो समूह जिल्लाले भ्रमको खेती गरिरहेको छ । यसलाई चिर्दै हामी अघि बढ्नु पर्ने छ । भ्रममा नपर्नु होस् । उल्टो काम गर्नेको विरूद्ध ठाउँ ठाउँमा भण्डाफोर गर्न आवश्यक छ, अध्यक्ष वाईबाले भन्नुभयो ।’