काभ्रेका माधव-झलनाथ समूहका दुई प्रदेश सांसदले एमालेका मुख्यमन्त्री अष्टलक्ष्मी शाक्यलाई साथ दिएका छन् । दलको नेता चयनमा काभ्रे संघीय निर्वाचन क्षेत्र नम्बर २ अन्तर्गतको प्रदेश सभा (क) का सांसद लक्ष्मण लम्साल र प्रदेश (ख) का सांसद बसुन्धरा हुमागाईले एमालेका अष्टलक्ष्मी शाक्यलाई साथ दिएका हुन् ।
वागमतीको ११० सदस्यीय प्रदेशसभामा एमालेका ५७ सांसद छन् । जसमध्ये २२ जना माधव नेपाल पक्षका छन् । बागमती प्रदेशमा माधव नेपाल पक्षकी प्रमुख नेतृ शाक्य नै एमालेको संस्थापन तर्फबाट मुख्यमन्त्री बनेपछि काभ्रेली दुई प्रदेश सांसदले पनि सहयोग गरेका हुन् ।
काभ्रेको चार वटा प्रदेश निर्वाचन क्षेत्रमा ३ वटा तत्कालीन एमालेका सांसद विजयी भएका थिए । सांसद चन्द्र लामा यसअघि देखिनै एमाले संस्थापन ओली समूहमै हुनुहुन्छ । काभ्रेका माधव-झलनाथ समूहका दुई प्रदेश सांसदले एमालेका मुख्यमन्त्री अष्टलक्ष्मी शाक्यलाई साथ दिएपछि जिल्लाको माहोल एकाएक तरंगित बनेको छ । प्रदेश सांसदहरूको क्रियाकलापले अन्य कार्यकर्ता समेत अलमलमा परेको देखिन्छ ।
यद्यपि काभ्रेका माधव-झलनाथ समूहका दुई प्रदेश सांसद लम्साल र हुमागाईंले एमालेका मुख्यमन्त्री अष्टलक्ष्मी शाक्यलाई साथ दिएपनि एमालेमै रहने वा माधव नेपालको दल रोजेको भन्ने बारे आधिकारिक खुलाउन चाएका छैनन् ।
किन भने २२ जना तत्कालीन एमालेका बागमती प्रदेश सांसदहरू माधव नेपाल समूहका छन् । राजेन्द्र पाण्डे बाहेक अष्टलक्ष्मी शाक्यलाई मुख्यमन्त्री बनाउनेमा एकमत देखिए पनि अझै नेपाल पक्षका सांसदहरुले समर्थन फिर्ता लिएको खण्डमा अष्टलक्ष्मीको सरकार अल्पमतमा पर्ने देखिएको छ ।
दल रोज्न पाउने ब्यवस्था अन्तर्गत काभ्रेका दुबै प्रदेश सांसदले केहिदिन गहन छलफल गर्ने देखिएको छ । कार्यकर्ता र मतदाताको भावना बुझेर मात्रै दल त्यागको निर्णय लिने मनस्थितिमा दुबै सांसद देखिएका छन् । दुबै जना सांसदले सामाजिक सञ्जाल फेसबुक मार्फत मुख्यमन्त्री अष्टलक्ष्मी शाक्यलाई बधाई समेत दिएका छन् ।
मुख्यमन्त्रीमा शाक्यलाई सहयोग गर्नु र माधव नेपालको दलको केन्द्रीय कमिटीमा काभ्रेबाट एक जनापनि नसमेटिनुलाई निकै अर्थपूर्ण रुपमा हेरिएको छ ।
Facebook Comments