बनेपामा माधव-झलनाथ समूहका युवाले वितरण गरे मास्क

मयुवा संघ नेपाल काभ्रेले राजधानी पूर्वको मुख्य ब्यापारिक केन्द्र बनेपामा मास्क वितरण गरेको छ । कोरोना भाईरसबाट जोगिन सचेतना जोगाउने उद्देश्यले मास्क वितरण गरिएको युवा संघ नेपाल काभ्रेले जनाएको छ । मास्क वितरण कार्यक्रमको उद्घाटन पैदल यात्रुलाई मास्क दिएर युवा संघ नेपालका केन्द्रीय सचिव एव कार्यक्रमका प्रमुख अतिथी भेषराज शाहले गर्नुभएको थियो ।

कोरोना भाईरसको दोस्रो लहर सुरू भए यता लकडाउनका बेला पनि जिल्लामा निकै सक्रिय रहेको युवा संघले मास्क वितरण गरेको हो । बनेपामा अरनिको राजमार्गको दायाँ बायाँ चारदोबाटो देखि नालादोबाटो र नालादोबाटो देखि चारदोबाटोसम्म मास्क वितरण गरिएको युवा संघ नेपाल काभ्रेका सचिव जयराम केसीले जानकारी दिनुभयो ।

युवा संघ काभ्रेले बनेपामा करिब १ हजार पिस सर्जिकल मास्क वितरण गरेको हो । ‘कोरोना भाईरसबाट जोगिन मास्क अनिवार्य लगाउनु पर्छ भनेर सांकेतिक रुपमा सन्देश दिन गरिएको कार्यक्रम हो । युवा संघ नेपाल बनेपा जस्तै देशका मुख्य-मुख्य बजार क्षेत्रमा मास्क वितरण गर्ने उद्देश्यका साथ अघि बढेको छ, युवा संघ नेपालका केन्द्रीय सचिव भेषराज शाहले भन्नुभयो ।’

युवा संघ नेपाल काभ्रेको मास्क वितरण कार्यक्रममा ईलाका प्र हरी कार्यालय बनेपाका प्रमुख राजन कोईरालाले नालादोबाटो देखि चारदोबाटोसम्म साथ दिनुभएको थियो । युवाहरूसंगै हिँडेर कोईरालाले मास्क नभएकालाई मास्क दिँदै, सकेसम्म भिडभाडमा ननिस्कन र निस्कनै परे नाक-मुख राम्रोसंग छोप्ने गरी मास्क लगाउन पैदल यात्रुलाई आग्रह गर्नुभयो ।

कार्यक्रममा युवा संघ नेपाल काभ्रे जिल्ला कमिटीका पदाधिकारी सहभागी भएका थिए । उनीहरूले मास्क लगाउन र कुनै सरसमान छोएपछि राम्रोसंग साबुन पानीले हात धुन र साबुन पानी नभएको गुणस्तरीय स्यानिटाजरको प्रयोग गरेर हात सफा राख्न सुझाएका थिए । ‘युवा संघ काभ्रेले दोस्रो पटकको लकडाउनका बेला समस्यामा परेका घरपरिवारलाई खाद्यान्न सहयोग गर्यो । काभ्रेमा युवा संघका साथीहरू निकै सक्रिय हुनुहुन्छ । तपाईहरू यसैगरी अघि बढ्नोस् । जिल्ला कमिटीलाई साथ सहयोग गर्न केन्द्रीय कमिटी सधै तत्पर छ, केन्द्रीय सचिव शाहले भन्नुभयो ।’

युवा संघ नेपाल काभ्रे जिल्ला कमिटीले हप्ताको एक दिन जिल्लाका बिभिन्न शहर र बजारहरुमा माक्स वितरण र सचेतना कार्यक्रम गर्ने घोषणा गरेको छ ।