नमोबुद्ध नगरपालिकामा बृहत सुख्खा क्षेत्र खानेपानी आयोजना निर्माणको तयारी अन्तिम चरणमा

काभ्रे नमोबुद्ध नगरपालिकामा बृहत सुख्खा क्षेत्र खानेपानी आयोजना निर्माण हुने भएको छ । खनालथोक-खाक्सी बृहत सुख्खा क्षेत्र खानेपानी आयोजना नाम दिइएको ठूलो परियोजना निर्माणको अन्तिम चरणमा पुगेको हो ।

आयोजनाको भिडिओ हेरौँ 

आयोजना निर्माणको अन्तिम चरण स्वरूप जलवायु अनुकुलित बृहत खानेपानी आयोजनाका प्रमुख अरूण सिम्खडा, संघीय खानेपानी तथा ढल ब्यवस्थापन आयोजना भक्तपुरका प्रमुख राजेन्द्र श्रेष्ठ, खनालथोक-खाक्सी बृहत सुख्खा क्षेत्र खानेपानी तथा सरसफाई उपभोक्ता समितिका अध्यक्ष मोहन कुमार क्षेष्ठ, राजनीतिक दलका प्रतिनिधि र उपभोक्ताको टोलीले स्थलगत अवलोकन समेत गरिसकेको छ ।

अब आयोजनाको छिट्टै टेण्डर प्रक्रिया अघि बढाउने संघीय खानेपानी तथा ढल ब्यवस्थापन आयोजना भक्तपुरका प्रमुख राजेन्द्र श्रेष्ठले जानकारी दिनुभयो । ‘हामी आयोजनाको मुहानदेखि मुख्य ट्याङ्की रहने ठाउँसम्मको स्थलगत अवलोकन गरिसकेका छौं । उपभोक्ता समितिले गर्नु पर्ने कामका विषयमा पनि छलफल गरिसकेका छौं । अब छिट्टै टेण्डर प्रक्रिया अघि बढ्छ, आयोजना प्रमुख श्रेष्ठले भन्नुभयो ।’

नमोबुद्ध नगरपालिकाको वडा नम्बर ६ को सिस्ने खेत स्थित रोशी खोलाको पानी पम्पिङ सिस्टमबाट दाप्चा क्षेत्रमा बन्ने मुख्य ट्याङ्कीमा खसालिने छ । ‘हामी जतिसक्दो छिटो आयोजना सुरू होस् भन्ने पक्षमा छौं । स्थानीय स्तरमा समन्वय गर्ने जिम्मा हाम्रो हो । समयमै आयोजना सकाउन हामी कुनै कसर बाँकी राख्दैनौ, उपभोक्ता समितिका अध्यक्ष श्रेष्ठले भन्नुभयो ।’

अहिले नमोबुद्ध नगरपालिकाको वडा ६, ७ र ८ का १६ सय घरधुरीलाई शुद्ध खानेपानी खुवाउने लक्ष्य राखिएको छ । तर स्थानीय स्तरमा वडा नम्बर ९ लाईपनि समेट्ने गरी बहस थालिएको छ । ‘नमोबुद्ध नगरपालिकाको माथिल्लो भेगका जनता खानेपानीको चरम समस्या हुनुहुन्छ । बेलैमा खानेपानीको ब्यवस्था नगर्ने हो भने अहिलेको बस्ती अझ विस्थापित हुनेछ । पानीको ब्यवस्थापन गर्न सकिए यहिका नागरिकको आयस्रोत बढ्छ, उपभोक्ता समितिका कोषाध्यक्ष कृष्ण खनालले भन्नुभयो ।’

काभ्रे जिल्लामा बृहत सुख्खा क्षेत्र खानेपानीका दुईवटा योजनामा धमाधम काम भैरहेको छ । नेपालकै दोस्रो तेमाल बृहत सुख्खा क्षेत्र खानेपानी आयोजनाको ७० प्रतिशत काम सकिएको छ । त्यस्तै चौरीदेराली गाउँपालिकामा पनि सुख्खा क्षेत्र खानेपानी आयोजनाका काम भैरहेको संघीय खानेपानी तथा ढल ब्यवस्थापन आयोजना भक्तपुरका प्रमुख राजेन्द्र श्रेष्ठले जानकारी दिनुभयो ।

मण्डनदेउपुर बृहत सुख्खा क्षेत्र खानेपानी आयोजनाको काम पनि अघि बढेको छ । टेण्डर प्रक्रिया सक्किएर निर्माण कम्पनीसंग सम्झौता समेत भैसकेको छ । यो आयोजनाको छिट्टै शिलान्यास गर्ने तयारी गरिएको छ । खनालथोक-खाक्सी बृहत सुख्खा क्षेत्र खानेपानी आयोजनाको भने अब टेण्डर हुनेछ ।