धुलिखेलको देवीस्थान पार्क निर्माणका लागि टेण्डर आव्हान

काभ्रेको धुलिखेल नगरपालिकाको देवीस्थान क्षेत्रमा निर्माण हुने भब्य पार्कको टेण्डर आव्हान भएको छ । पहिलो चरणको काम सकिएको देवीस्थान पार्कमा थप सुविधा थप्न टेण्डर आव्हान भैसकेको नगरप्रमुख अशोक कुमार ब्याञ्जु श्रेष्ठले जानकारी दिनुभयो ।

देवीस्थान पार्कका लागि धुलिखेल नगरपालिका र संस्कृति, पर्यटन तथा नागरिक उड्डयन मन्त्रालय साझेदारी रहने छ । ७ करोड रूपैयाँको टेण्डर आव्हान भएको नगरप्रमुख ब्याञ्जुले बताउनुभयो । ‘देवीस्थान पार्क निर्माणका लागि टेण्डर खुलाएका छौ । दुई वर्षभित्र पूर्णरुपमा सञ्चालनमा आँउछ । यो धुलिखेल नगरपालिकाभित्र अहिलेसम्मकै धेरै लगानी भएको पार्क बन्नेछ, नगरप्रमुख ब्याञ्जुले भन्नुभयो ।’

पार्कमा पहिलो चरणको काम पुरै सकिएको ईन्जिनियर राजन न्यौपानेले बताउनुभयो । उहाँका अनुसार बागमती प्रदेश सरकार र धुलिखेल नगरपालिकाको ५०/५० प्रतिशत लगानीमा पहिलो चरणको काम सकिएको हो । पहिलो चरणमा २ करोड लगानी भएको थियो ।

७ करोड लगानीमा स्वास्थ्य कार्यालय देखिको सडक फराकिलो र पिच समेत हुनेछ । यो सडक अब १६ फुटको बन्नेछ । पिक्निक सेन्टर, पार्किङ्ग गर्ने ठाउँ, कोसेली घर पनि पार्कको क्षेत्रभित्रै निर्माण गरिने नगरप्रमुख ब्याञ्जुले बताउनुभयो ।

त्यस्तै बाइनाकुलर सहितको भ्यु सेन्टर समेत निर्माण हुनेछ । भ्यूटावरबाट, धुलिखेलर, बनेपा, पाँचखाल, पनौती लगायतका क्षेत्र मज्जाले अवलोकन गर्न सकिन्छ । ब्याञ्जु नगरप्रमुखमा निर्वाचित भए यता हालसम्म ३६ वटा पार्क बनिसकेका छन्। अझै कतिपय ठाउँमा बन्ने चरणमा रहेका छन् ।