मण्डनदेउपुर नगरपालिकाको वडा नम्बर ४ पुर्कोटीटोल सिल

काभ्रेको मण्डनदेउपुर नगरपालिकाले वडा ४ को पुर्कोटीटोल सिल गरेको छ । आज सूचना जारी गर्दै कोरोना भाईरसको सं क्रमित बढेको भन्दै भन्दै सिल गरिएको जनाएको छ ।

पूर्वमा नौलो डाँडा, पश्चिममा सूर्य तामाङको पसल, उत्तरमा नेपालटोल र दक्षिणमा डोल बहादुर पराजुलीको पसल क्षेत्रलाई सिल गरिएको हो । आज राति १२ बजेदेखि भदौ ४ गतेसम्म आवातजावात पूर्ण रुपमा बन्द गरिएको नगरपालिकाले जनाएको छ ।

गैह्रीटोल र पुर्कोटीटोलमा कोरोना भाईरस तीब्र गतिमा फैलिएको र अन्य ठाउँमा नफैलियोस् भन्नका लागि पूर्ण रुपमा आवातजावात बन्द गरिएको प्रमुख प्रशासकीय अधिकृत प्रणराज न्यौपानेले बताउनुभयो । सिल अवधिभर दैनिक अत्यावश्यक सामग्री तथा सेवा वडा कार्यालय र जनप्रतिनिधिसंग समन्वय गरेर गर्न भनिएको छ ।

केहिदिन देखि यी टोलका धेरै जनामा कोरोना भाईरससंग मिल्दोजुल्दो लक्षण देखिएको थियो । स्वाब परीक्षणका क्रममा १७ जनामा संक्रमण पुष्टि भएको स्वास्थ्य शाखा प्रमुख दिपक घिमिरेले जानकारी दिनुभयो । अधिकांशमा लक्षण सहितको संक्रमण देखिएको छ ।

नियमित कन्ट्याक्ट ट्रेसिङ गर्नुपर्ने भएकाले यो क्षेत्र सिल गरिएको हो । स्वास्थ्य कार्यालय काभ्रेका बरिष्ठ स्वास्थ्य प्रशासक डाक्टर नरेन्द्र कुमार झाका अनुसार मण्डनदेउपुर नगरपालिका भर ४५ जना सक्रिय संक्रमित छन् ।