धुलिखेलका भूमिहीनले जग्गा पाउन निवेदन दिँदा भुल्नै नहुने यी ‘५ कागजपत्र’

काभ्रेको धुलिखेलले भूमिहीनका ३५ दिने सूचना आह्वान गरेको छ । प्रमुख प्रशासकीय अधिकृत रातानाथ लुइँटेलले एक सूचना मार्फत ३५ दिन भित्र  निवेदन दिन आग्रह गर्नुभएको हो ।

नगरपालिकाले भूमिहीन दलित, भूमिहीन सुकुम्बासी र अब्यबस्थित बसोबास गरिरहेका घर परिवारले जग्गा माग सहितको निवेदन दिन सक्नेछन् । आ आफ्नो वडा कार्यालयमा निवेदन दिन सक्न प्रमुख प्रशासकीय अधिकृत लुइँटेलले बताउनुभयो ।

तपाई निवेदन दिँदै हुनुहुन्छ भने यी कागजपत्र हमेशा ख्याल राख्नुस् 

१. परिवारका सबै सदस्यको नागरिकताको फोटोकपी

२. परिवार मुली र निजको पति पत्नीको हालसालै खिचेको पासपोर्ट साइजको फोटो ।

३. अब्यबस्थित बसोबासीको हकमा आफु र परिवारका सदस्यको नाममा अन्यत्र रहेको सबै जग्गाको पूर्जाको प्रतिलिपी र सम्बन्धित स्थानीय तहले सम्पत्तिकर प्रयोजनका लागि निर्धारण गरेको मुल्याङ्कन सम्बन्धित स्थानीय तहको पत्र ।

४. आफुसंग भएको अन्य प्रमाण जस्तै: घरसार कागजको प्रतिलिपी, मतदाता परिचयपत्र, विद्युत तथा पानी महसुल बुझाएको प्रमाण, स्थानीय तहले घर धुरी कायम गरी कर संकलन गरेको प्रमाणपत्र ।

५. मिति २०७६ साल पुस २८ गतेभन्दा १० बर्ष अघिबाट निज बसोबास गरि आएको र जग्गा आवद/कमोद भई हो भनि सम्बन्धित वडा कार्यालयले गरेको सिफारिस ।

नगरपालिकाले भदौ ३ गतेभित्र आ आफ्नो वडा कार्यालयमा निवेदन दिन सक्न भूमिहीन दलित, भूमिहीन सुकुम्बासी र अब्यबस्थित बसोबास गरिरहेका घर परिवारलाई आग्रह गरेको छ ।