काभ्रेको मण्डनदेउपुर नगरपालिकामा सञ्चालन हुने ‘मण्डनदेउपुर बृहत सुख्खा क्षेत्र खानेपानी आयोजना’ सम्पन्न गर्न त्रिपक्षीय सम्झौता भएको छ । आज कुन्ताबेसीमा संघीय खानेपानी तथा ढल व्यवस्थापन आयोजना भक्तपुर, मण्डनदेउपुर नगरपालिका र मण्डनदेउपुर बृहत सुख्खा क्षेत्र खानेपानी तथा सरसफाइ उपभोक्ता संस्था वीच त्रीपक्षीय सम्झौता गरिएको हो ।
सम्झौता पत्रमा संघीय खानेपानी तथा ढल व्यवस्थापन आयोजना भक्तपुरको तर्फबाट आयोजना प्रमुख राजेन्द्र श्रेष्ठ, मण्डनदेउपुर नगरपालिकाको तर्फबाट नगरप्रमुख टोक बहादुर वाईबा र मण्डनदेउपुर बृहत सुख्खा क्षेत्र खानेपानी तथा सरसफाई उपभोक्ता संस्थाको तर्फबाट अध्यक्ष राम बहादुर तामाङले हस्ताक्षर गर्नुभएको छ ।
यो खानेपानी आयोजनाका लागि पहिलो चरणमा ५४ करोडको ठेक्का आह्वान भैसकेको छ । गत चैतमा उक्त खानेपानी आयोजनालाई एक अर्ब स्वीकृत भएको थियो । आयोजनाका लागि नेपाल सरकार खानेपानी तथा ढल व्यवस्थापन विभागको ९६ करोड र स्थानीय उपभोक्ताबाट सङ्कलित तथा नगरको लगानीसहित एक अर्बको आयोजना स्वीकृत गरिएको हो ।
नगरको १२ वडामध्ये खानेपानीको समस्या झेलिरहेको ४, ५, ६, ७, ८, ९, १०, ११ र १२ वडाका ५ हजार ५ सय ५ घरपरिवार लाभान्वित हुने छन् । उपभोक्ता समितिले आयोजनाका लागि स्थानीयवासीसँग प्रति उपभोक्ता एक हजार लिएको छ । नगरपालिकाले खानेपानी आयोजनाका लागि करिब एक करोड लगानी गर्ने सम्झौता गरिएको उपभोक्ता संस्थाका अध्यक्ष रामबहादुर तामाङले बताउनुभयो ।
नगरस्थित ७ नम्बर वडाको सोते र १० नम्बरको नारिमखर्क भएर बगेको इन्द्रावती नदीमा इनार बनाएर लिफ्टमार्फत नगरका बासिन्दामा खानेपानी उपलब्ध गराइने योजना बनाइएको संघीय खानेपानी तथा ढल व्यवस्थापन आयोजना भक्तपुरका आयोजना प्रमुख राजेन्द्र श्रेष्ठले बताउनुभयो । खानेपानी वितरणका लागि मुख्यसहित ३० ट्याङ्की निर्माण गरिनेछ ।
Facebook Comments