काभ्रेको पनौती नगरपालिकाका किसानको धानबालीमा देखिएको लक्षणको रोग पत्ता लागेको छ । राष्ट्रिय बाली रोग अनुसन्धान केन्द्र खुमलटारले पनौतीको धानबालीमा लागेको रोग पत्ता लगाएको हो ।
अनुसन्धान केन्द्रले धानबालीमा Sheath Blight देखिएको जनाएको छ । अनुसन्धान केन्द्रले धानबाली जोगाउने उपाय समेत बताएको छ ।
विज्ञले धान खेतमा पानीको निकासको राम्रो व्यवस्था गर्न सुझाव दिएका छन् । त्यस्तै हिनासोन वा भ्यालिडामासिन नामक औषधी २ मिलिलिटर पानीको दरले मिसाई डाँठ र जरा भिज्ने गरी ७ देखि १० दिनको फरकमा रोगको प्रकोप हेरी दुईदेखि तीनपटकसम्म सोही मात्रामा विषादी प्रयोग गर्न सुझाव दिएका छन् ।
विज्ञहरुले नाइट्रोजन मलको बढी मात्रामा प्रयोग नगरी फस्फोरस र पोटास मल कृषि प्रविधिकको सिफारिसका आधारमा प्रयोग गर्न किसानलाई भनेका छन् । त्यस्तै बाक्लो हुने गरी धानको बेर्ना नरोप्न समेत विज्ञहरूले किसानहरुलाई सुझाव दिएका छन् ।
पनौतीको खोपासी लगायत विभिन्न फाँटमा लगाइएको धानको बेर्ना सुक्दै गएपछि किसानहरु चिन्तित भएका छन् । धानबालीमा लागेको रोग पत्ता लगाइदिन नगरपालिकाको कृषि तथा पशुपन्छी शाखाले राष्ट्रिय बाली रोग अनुसन्धान केन्द्रलाई पत्र पठाएको थियो । सोही पत्रको आधारमा केन्द्रले अनुसन्धान गरी रोग पत्ता लगाएको हो ।
स्थानीयस्तरमै पनि नगरपालिकाको कृषि तथा पशुपन्छी शाखाले धानबालीमा लागेको रोग निवारणका लागि विभिन्न क्रियाकलापहरु सञ्चालन गर्दै आइरहेको छ । अब रोग पत्ता लागेपछि औषधी उपचार गर्न निकै सजिलो हुने बताइएको छ।
Facebook Comments