बीपी राजमार्गको काभ्रे खण्ड अवरुद्ध

अविरल वर्षासंगै आएको भेलबाढीले बीपी राजमार्ग अन्तर्गत काभ्रे खण्ड अवरुद्ध भएको छ । आज रातिदेखि राजमार्ग अन्तर्गत रोशी गाउँपालिकाका विभिन्न खहरे र खोल्सामा आएको बाढीले राजमार्ग अवरुद्ध भएको हो ।

माम्ति र भ्याकुरे खोलामा लेदो सहित बाढी आउँदा वीपी राजमार्ग अवरुद्ध भएको जिल्ला प्र हरी कार्यालय काभ्रेका डिएसपी हरि खतिवडाले जानकारी दिनुभयो । राजमार्ग अवरुद्ध भएपछि राजधानीबाट पूर्वी पहाड र तराईका जिल्ला हिँडेका सवारी साधन बिचमै अलपत्र परेका छन् ।

त्यस्तै राजधानी आउदै गरेका सबै सवारी साधन बिचैमा रोकिएका छन् ।’माथिबाट निरन्तर लेदो सहितको बाढी आइरहेको छ । बाढी कम नहुँदासम्म लेदो हटाउन सक्ने अवस्था छैन् । तर पनि राजमार्ग खुल्लान प्रयास भैरहेका छन्, डिएसपी खतिवडाले मिलिजुली खबरसंग भन्नुभयो ।’

मान्ति खोलाले बर्षेनी बीपी राजमार्ग अवरुद्ध पार्दै आएको छ । तर समाधानको उपाय भने अपनाइएको छैन् । हिउँदमा सुक्ने र बर्खामा उर्लिने मान्ति खोलामा पुल समेत छैन् । राजमार्गबाटै खोला बग्ने गरेको छ । जसका कारण वर्षैपिच्छे यात्रुले हैरानी खेप्दै आएका छन् ।

वीपी राजमार्गको काभ्रे खण्डका खोल्साहरूमा कज्वे मात्रै बनाईएको छ । भीमखोरी, मंगलटार लगायतको माथिल्लो भागमा पानी पर्न थालेपछि बीपी राजमार्ग प्रायः अवरूद्ध हुँदै आएको छ ।

निरन्तरको बर्षाले काभ्रे जिल्लाको अधिकांश भित्री सडकहरू पनि अवरुद्ध छन् । अरनिको राजमार्गको काभ्रे खण्डमा भने अहिलेसम्म कुनै समस्या नरहेको डिएसपी खतिवडाले बताउनुभयो ।