तेमाल ठूलोपर्सेलका किसानलाई आधुनिक औजार

काभ्रेको तेमाल गाउँपालिका वडा नम्बर ६ ठूलो पर्सेलका किसानलाई आधुनिक औजार वितरण गरिएको छ । ‘कृषिको आधुनिक ब्यवसायिकरण, जीवन निर्वाहका लागि लिनु पर्दिन अरुको शरण’ भन्ने तेमाल गाउँपालिका नारालाई आत्मसात गर्दै विभिन्न कृषि औजार वितरण गरिएको वडाध्यक्ष विकु तामाङले जानकारी दिनुभयो ।

खाध्य तथा सुरक्षामा टेवा पुर्याउने बाली वस्तुको साना ब्यवसायिक कृषि उत्पादन केन्द्र पकेट विकास कार्यक्रम अन्तर्गत वडा नम्बर ६ द्वरे टोल कृषक समुहलाई कृषि औजार वितरण गरिएको हो ।

किसानलाई उपाध्यक्ष दुर्गामाया तामाङले ट्याक्टर २० थान, मकै छोडाउने मेसिन १५ थान, मकै गोड्ने मेसिन १५ थान र विषादी छर्ने स्प्रे ३० थान वितरण गर्नुभएको हो । ‘कम लागतमा धेरै आम्दानी लिएर कृषिलाई आत्मनिर्भर पेसाको रूपमा विकास गर्न आधुनिक कृषि औजार वितरण गरिएको हो, यसले खेती गर्न किसानलाई सहयोग पुग्नेछ, उपाध्यक्ष तामाङले भन्नुभयो ।’

सोहि वडा गरिबी निवारणका लागि लघु उद्यम विकास (मेड्पा) कार्यक्रम अन्तर्गत सञ्चालित सिलाई कटाई , च्याउ खेती र किस्टल माला तालिम पनि सकिएको छ । सहभागीहरूलाई उपाध्यक्ष तामाङले प्रमाणपत्र वितरण गर्दै सीपलाई ब्यवहार उतारेर आयआर्जन गर्न आग्रह गर्नुभएको थियो ।