धुलिखेल नगरपालिकाका नगरप्रमुख अशोक कुमार ब्याञ्जु श्रेष्ठले अब सबै विकास निर्माणको काम टोल विकास समितिमार्फत गरिने बताएको छ । यसअघि उपभोक्त समिति मार्फत काम गर्दै आएकोमा अब टोल विकास समितिले सबै विकास निर्माणको काम गर्ने नगरप्रमुख श्रेष्ठको भनाई छ ।
आफू निर्वाचित भएर आइसकेपछि कुल विकास आयोजनाको जम्मा २२ वटा मात्रै ठेकेदारमार्फत गरिएको र बाँकी सबै उपभोक्ता समितिले काम सम्पन्न गरेको भन्दै नगरप्रमुख ब्याञ्जुले अबदेखि टोल विकास समितिलाई सक्रिय बनाउने र त्यसै अन्तर्गत विकास निर्माणका काम गरिने स्पष्ट पार्नुभयो ।
पटक पटक उपभोक्ता समिति बनाउने झन्झट समेत कम हुने नगरप्रमुखको ब्याञ्जुले बताउनुभयो । हरेक टोलमा एउटा टोल बिकास समिति हुनेछ । त्यो टोल विकास समितिमा प्रत्येक घरका एक जना सदस्य हुनेछन् । टोल विकास समितिले खानेपानी, सडक, शिक्षा, स्वास्थ्य लगायतका सबै विकास निर्माणका गतिविधि गर्ने नगरप्रमुख ब्याञ्जुले बताउनुभयो ।
नगरपालिका मातहत वडा कार्यालय, वडा कार्यालय मातहत टोल विकास समिति रहने अवधारणा अनुसार काम सुरु हुने उहाँको भनाई छ । स्थायी संरचना अन्तर्गत विकास निर्माणको कार्यक्रम गर्ने अवधारणा अनुसार टोल विकास समितिलाई सक्रिय बनाउन लागिएको नगरप्रमुख ब्याञ्जुले बताउनुभयो ।
टोल विकास समितिसँगको साझेदारी गर्नेबारे नीति समेत पास भइसकेको बताउँदै नगरप्रमुख ब्याञ्जुले समुदायमा आधारित विकासलाई थप बढावा दिन मद्दत पुग्ने उद्देश्यले टोल विकास समितिलाई क्रियाशील बनाउन लागिएको बताउनुभयो ।
उपभोक्ता समिति मार्फत काम गर्दापनि जनस्तरबाट व्यापक मात्रामा सहयोग भएको भन्दै उहाँले टोल विकास समिति मार्फत गरिने विकासले अझ धेरै दीर्घकालिन महत्व राख्ने स्पष्ट पार्नुभयो ।
‘धुलिखेल नगरपालिका प्रत्येक टोलमा सक्षम नागरिक हुनुहुन्छ । उहाँहरूमा विकासलाई दीर्घकालीन महत्वको साथ अघि बढाउने सोच छ । फेरि एकपटक टोल विकास समितिलाई सक्रिय बनाएर हामी स्थायी संरचना मार्फत नगरपालिकालाई नमूना बनाउँदैछौं, नगरप्रमुख व्याञ्जुले भन्नुभयो ।’
Facebook Comments