अनैकोटका अग्निपिडीत बिकलाई युवा संघ र अनेरास्ववियूको सहयोग

युवा संघ नेपाल काभ्रे र अनेरास्ववियूले पाँचखाल नगरपालिका वडा नम्बर १ अनैकोटका अग्निपिडीतलाई सहयोग प्रदान गरेका छन् । जेठ २७ गते आगलागी हुँदा घर जलेर नष्ट भएको बाबुराम बिकको परिवारलाई सहयोग गरेको युवा संघ नेपालका केन्द्रीय सचिव एवं राहतको नेतृत्वकर्ता भेषराज शाहले जानकारी दिनुभयो ।

बिकको परिवारलाई आज घरैमा पुगेर बागमती प्रदेश सांसद लक्ष्मण लम्सालले ४५ हजार ५ सय रूपैयाँ नगद हस्तान्तरण गर्नुभएको हो । त्यसैगरी २ बोरा चामल, तेल, मसला, १ थान ब्यालेकेट, २ थान सिरानी, झुल १ थान र केही कपडा बिक परिवारलाई हस्तान्तरण गरेको युवा संघ नेपालका केन्द्रिय सदस्य पुरुषोत्तम आचार्यले बताउनुभयो ।

आगलागीमा परि बाबुरामका मामा हर्क बहादुर बिकको निधन भएको थियो । नगद र खाद्यान्न सामग्री हस्तान्तरण गर्दै सांसद लम्सालले दुःखमा साथ दिन आफु र आफ्नो पार्टी, भ्रातृ संगठन सधै तयार रहेको बताउनुभयो ।

युवा संघ नेपाल काभ्रे र अनेरास्ववियूले जिल्लामा नि षेधाज्ञा जारी भएको दोस्रो हप्ता देखि नै दैनिक छाक टार्न समस्या झेलिरहेका घरपरिवारलाई खाद्यान्न सहयोग गर्दै आईरहेको छ । त्यसैगरी बिभिन्न स्थानीय तहहरूलाई स्वास्थ्य सामग्री पनि हस्तान्तरण गरेको छ ।