मण्डनदेउपुर नगरपालिकाले भन्यो ‘बैकल्पिक विधिबाट भर्ना गर्नु’

काभ्रेको मण्डनदेउपुर नगरपालिकाले सबै विद्यालयहरूलाई सकेसम्म बैकल्पिक विधि अपनाएर भर्ना लिन आग्रह गरेको छ । आज प्रमुख प्रशासकीय अधिकृत प्रणराज न्यौपानेले एक सूचना मार्फत नगरभित्रका सबै विद्यालयहरूलाई यस्तो आग्रह गर्नुभएको हो ।

प्रमुख प्रशासकीय अधिकृत न्यौपानेले सकेसम्म टेलिफोन, शिक्षक घरदैलो, ईमेल जस्तो विधि प्रयोग गरेर भर्ना लिन भन्नुभएको छ । शिक्षा विज्ञान तथा प्रविधि मन्त्रालयले आजदेखि भर्ना लिन विद्यालयहरूलाई आग्रह गरेको थियो ।

प्रमुख प्रशासकीय अधिकृत न्यौपानेले जनस्वास्थ्यका सबै मापदण्ड पालना गरेर मन्त्रालयले भने बमोजिम नै भर्ना कार्यक्रम सुरू गर्न आग्रह गर्नुभएको छ । कक्षागत दिन, समय र विद्यार्थीलाई आलोपालो बोलाएर कोरोना भाईरसको सं क्रमणबाट जोगिने गरी भर्ना लिन नगरपालिकाले भनेको छ ।

कक्षा सञ्चालनको जानकारी भने अर्को निर्णय भएपछि मात्रै गराउने प्रमुख प्रशासकीय अधिकृत न्यौपानेले बताउनुभयो ।