नगरप्रमुख वाईबाद्वारा वडा नम्बर १ मा योजना अनुगमन

मण्डनदेउपुर नगरपालिकाका प्रमुख टोक बहादुर वाईबाले वडा नम्बर १ मा निर्माण भैसकेका योजनाको अनुगमन गर्नु भएको छ । आज नगरपालिकाका प्रवक्ता डिल्ली प्रसाद आचार्य र स्वकीय सचिव गणेश पराजुली सहित वडा नम्बर १ मा पुग्नुभएका नगरप्रमुख वाईबाले वडाका विभिन्न योजनाको अनुमान गर्नुभएको हो ।

नगरप्रमुख वाईबाले गैरीगाउँ चि’हान पाटी, डाँडागाउँ चि’हान पाटी, फुटबल मैदान र देवी थान मन्दिरको अवलोकन गर्नुभएको छ । अनुगमनका क्रममा नगरप्रमुख वाईबाले प्राविधिक स्टामिट अनुसार नै काम गर्न र कुनै समस्या परे तत्काल नगरपालिकाका प्राविधिकसँग बुझेर मात्रै काम अघि बढाउन निर्देशन दिनुभएको स्वकिय सचिब पराजुलीले जानकारी दिनुभयो ।

नगरप्रमुख वाईबाले गुणस्तरहिन काम गर्न कसैलाई छुट नरहेको भन्दै आफ्नो गाउँ ठाउँको विकास निर्माण बारे चासो राख्न स्थानीयहरूलाई समेत आग्रह गर्नुभयो ।

‘नगरपालिकाले बजेट पठाएको छ । तर काम के कसरी भैरहेको छ भनेर सबै स्थानीय चनाखो हुनुपर्छ । चासो राख्नु पर्छ । अनि मात्रै विकास निर्माणको काम गुणस्तरीय हुन्छ, नगरप्रमुख वाईबाले भन्नुभयो ।’

वडाध्यक्ष लक्ष्मण प्रसाद बस्ताकोटीले योजना अनुगमनको समन्वय गर्नु भएको थियो । नगरप्रमुख वाईबाले रकम अभाव हुने समस्या देखाएर काम अधुरो र गुणस्तरहिन गरे जो कोहि पनि कारबाहिको भागीदार हुने बताउनुभयो ।

‘रकम नपुगे स्रोत जुटाउने काम नगरपालिकाले गर्छ । तर भने बमोजिमको काम हुनै पर्छ । झारो टर्ने गरि मात्रै कसैले काम गर्छ भने त्यो मलाई मान्य हुँदैन्, नगरप्रमुख वाईबाले भन्नुभयो ।’