काभ्रेका सबै स्थानीय तहले मागे इमेलबाट राय सुझाव

काभ्रेका सबै स्थानीय तहले आगामी आर्थिक वर्षका लागि बनाउने योजनाको विषयमा इमेलमार्फत राय, सल्लाह, सुझाव मागेका छन् । सूचना जारी गर्दै स्थानीय तहले इमेलमार्फत आवश्यक सल्लाह सुझाव दिन भनेका हुन् ।

कोरोना भाइरसको जोखिम बढिरहँदा गाउँ घर पुगेर योजना छनौट गर्न सम्भव नभएपछि कतिपय स्थानीय तहले भर्चुअल माध्यमबाट आफ्नो गाउँठाउँका योजनामा बजेट माग गर्न आग्रह गरेका छन् । कतिपय स्थानीय तहले गैरसरकारी संघ संस्थाहरुलाई इमेलमार्फत नै आफ्नो पालिकामा सन्चालन गर्ने कार्यक्रम पठाउन समेत आग्रह गरेका छन् ।

स्थानीय तहले सार्वजनिक गरेका इमेल आइडीमा सरोकारवाला व्यक्ति, निकाय, गैरसरकारी संघसंस्थाहरु, विज्ञले आवश्यक सल्लाह, सुझाव दिन सक्नेछन् । यिनै सल्ला सुझावका आधारमा आगामी आर्थिक वर्ष २०७८/७९ को नीति, कार्यक्रम तथा बजेट तयार गर्ने पाँचखाल नगरपालिकाका प्रमुख प्रशासकीय अधिकृत शिव प्रसाद हुमेगाईले बताउनुभयो ।

जिल्लामा ६ वटा नगरपालिका र ७ वटा गाउँपालिका छन् । अहिले जिल्लाका १३ वटै स्थानीय तह आगामी आर्थिक वर्षको लागि नीति कार्यक्रम तथा बजेट निर्माणमा ब्यस्त छन् । असार १० गते भित्र आगामी आर्थिक वर्षको नीति, कार्यक्रम तथा बजेट नगर वा गाउँ कार्यपालिका बैठकले स्वीकृत गर्नु पर्ने हुन्छ ।

नगर वा गाउँ कार्यपालिका बैठकले स्वीकृत गरेका नीति कार्यक्रम तथा बजेट असार मसान्तभित्र बस्ने नगर वा गाउँसभाले पारित गरेपछि साउन १ गतेदेखि आगामी आर्थिक वर्षको बजेट, नीति तथा कार्यक्रम कार्यान्वयनमा आउँछ । नगर वा गाउँसभाले पारित नगर्दासम्म बजेट, नीति तथा कार्यक्रम कार्यान्वयनमा ल्याउन नमिल्ने प्रावधान छन् ।