बनेपामा शिल हटाईयो, पसल खोल्न पाईने

बनेपा नगरपालिकाले आफ्नो क्षेत्रमा पुर्ण रुपमा गरेको शिल हटाएको छ । नगरपालिकाले आज राति १२ बजेसम्म शिल गरेको थियो । राति १२ बजेबाटै शिल हटाएर नि षेधाज्ञा मात्रै लागु हुनेछ ।

शिल अवधिमा पसल, ब्यवस्थापन, बजार पूर्ण रुपमा बन्द गरिएको थियो । तर भोलीदेखि ब्यापार ब्यवसाय गर्न पाईने छ । भोली बिहान देखि २६ गतेसम्मका लागि पसल खोल्ने समय निर्धारण गरिएको छ ।

प्रमुख प्रशासकीय अधिकृत कविराज उप्रेतीका अनुसार विहान ६ बजेदेखि बिहान ९ बजेसम्म पसल खोल्न पाईनेछ । खाद्यान्न, ग्याँस, तरकारी, फलफूल, खानेपानी, पशुको दाना बेचबिखन गर्ने पसलहरू नेपाल सरकारले तोकेको जनस्वास्थ्यका सबै मापदण्ड पालना गरेर खोल्न पाईने छ ।

बनेपामा बैंक तथा वित्तीयहरू कर्मचारीको आलोपालो विधि मार्फत खोल्ने पाईनेछ । तर बिमा कार्यालयहरू खोल्न नपाईने प्रमुख प्रशासकीय अधिकृत उप्रेतीले बताउनुभयो । निजी तथा सार्वजनिक सावरी साधन भने चल्न पाउने छैनन् ।

उद्योग, कलाकारखाना पनि स्वास्थ्य सुरक्षाका मापदण्ड अपनाएर सञ्चालन गर्न पाईने छ । औषधी तथा अस्पताल, विजुली, सञ्चारका कार्यालय, फोहोर मैला व्यवस्थापनका कार्यालयहरू पनि खोल्न पाईने छ । भिडभाड हुने जिमखाना, सिनेमा हल, विद्यालय, पार्टी प्यालेस, होटल, रेष्टुरेन्ट खोल्न पाईने छैन ।

बनेपा नगरपालिकाले पहिलो पटक जेठ ४ गते राति १२ बजेदेखि १२ गतेसम्म शिल गरेको थियो । नगरपालिकाले दोस्रो पटक आजै राति १२ बजेसम्म शिलको समय अवधि थापेको थियो । राजधानी पूर्वका जिल्लाहरुको प्रमुख ब्यापारीक क्षेत्र बनेपा शिल हुँदा आर्थिक गतिविधि ठप्प भएको थियो ।