बनेपा जेठ १२ गतेसम्म शिल

धुलिखेल ३ जेठ : काभ्रेको मुख्य ब्यापारिक क्षेत्र बनेपा शिल गरिने भएको छ । नगरपालिकाले आज एक सूचना जारी गर्दै भोलीदेखि जेठ १२ गतेसम्म बनेपा शिल गरिने जनाएको हो ।

कोरोना संक्रमणको जोखिमका सबै क्षेत्र शिल गराएको बनेपा नगरपालिकाले जनाएको छ । नगरपालिकाले आज विभिन्न सरोकारवाला पक्षसँग छलफल गरेर शिल गर्ने निर्णय गरेको नगर प्रमुख लक्ष्मी नरसिंह बादेले जानकारी दिनुभयो । मंगलबार राति १२ बजेदेखि जेठ १२ बुधवार १२ बजेसम्म नगरपालिकाका सबै क्षेत्रशिल गरिएको हो ।

औषधी र अस्पताल बाहेकका खाद्यान्न, तरकारी, फलफूल पसल तथा ब्यवसाय, बैंक तथा वित्तीय संस्थाले प्रदान गर्ने सबै सेवा पूर्ण रुपमा बन्द हुनेछ । नगरपालिकाले बिहान मर्निङवाकमा समेत ननिस्कन भनेको छ ।

सूचना विभागबाट प्रेस पास लिएका पत्रकार बाहेक अन्य कुनै पनि ब्यक्ति अत्यावश्यक काम परेर जानै परे  स्थानीय प्रशासन तथा जनप्रतिनिधिलाई जानकारी गराएर मात्रै जान पाईनेछ । अरू ब्यक्ति घर बाहिर निस्कन पाईने छैन् ।

अत्यावश्यक सेवामा प्रयोग हुने सवारी बाहेक अन्य कुनै पनि सवारी साधन चलाउन नपाई नगरप्रमुख बादेले बताउनुभयो । उहाँका अनुसार फोहोर व्यवस्थापन, टेलिफोन, ईन्टरनेट र विद्युतको सेवा दिने कार्यालयहरू सीमित कर्मचारी राखेर जनस्वास्थ्यका सबै मापदण्ड पालना गरेर मात्रै खोल्न पाईनेछ ।

बनेपा नगरपालिका कोरोना भाईरसको दोस्रो लहरमा पनि निकै प्रभावित बनेको छ । जिल्लामा सक्रिय संक्रमितको संख्या १९ सय ५४ जना छन् भने  बनेपामात्रै ६८५ संक्रमित छन् ।