काभ्रे प्रहरीद्वारा दुई अस्पताललाई ४० थान अक्सिजन हस्तान्तरण

धुलिखेल ३० बैशाख: जिल्ला प्रहरी कार्यालय काभ्रेले धुलिखेल अस्पताल र शिर मेमोरियल अस्पताल बनेपालाई ४० थान अक्सिजन हस्तान्तरण गरेको छ । प्रहरीले यी दुई अस्पताललाई आज अक्सिजन हस्तान्तरण गरेको हो ।

प्रहरीले काभ्रे जिल्ला अन्तर्गतका व्यापार, ब्यवसायी, ग्रिल तथा आल्मुनियम उद्योगका साथै बिभिन्न बितरण केन्द्र र सहयोगी व्यक्तिहरुबाट संकलन गरेको खाली सिलिण्डरहरु भरेर दुई अस्पताललाई दिएको हो । प्रहरीका अनुसार धुलिखेल अस्पताललाई ३० थान र शिर मेमोरियल अस्पताल बनेपालाई १० थान अक्सिजन  हस्तान्तरण गरिएको छ ।

हाल सम्म जिल्ला प्रहरी कार्यालय काभ्रेले ६७ थान अक्सिजनका सिलिण्डरहरु संकलन गरेको छ । यसरी संकलन भएका सिलिण्डर पनौती नगरपालिका वडा नम्बर ५ मा रहेको नवज्योति ग्यासेज प्रा.लि.बाट भरेर आवश्यक परेका ब्यक्ति र स्वास्थ्य संस्थालाई दिने गरेको छ ।

काभ्रे प्रहरीले जो कोहि ब्यक्तिसँग अक्सिजनको सिलिण्डर छन् भने खबर गर्न आग्रह गरेको छ । अहिले जिल्लामा कोरोना संक्रमितको उपचार गराईरहेका दुई ठूला अस्पतालमा अक्सिजनको हाहाकार मच्चिएको छ ।