सिन्धुपाल्चोकका युवाले गाउँ-गाउँमा सुरू गरे स्वास्थ्य सामग्री वितरण गर्न

धुलिखेल ३० बैशाख: सिन्धुपाल्चोक जिल्लाको चौतारा साँगाचोकगढी नगरपालिका वडा नम्बर १४ डडुवाका युवाहरूले स्वास्थ्य सामग्री वितरण सुरू गरेका छन् । युवाहरू सरोज बोहरा, सुजन बस्नेत र शहदेब बस्नेतको अनुवाईमा संकलन गरिएको स्वास्थ्य सामग्री गाउँमा आजबाट वितरण सुरू गरिएको हो ।

आज बस्नेत गाउँ, माझ गाउँ, झाँक्रीगाउँ हुँदै माथिल्लो बस्तीमा मास्क, साबुन, स्यानिटाजर लगायतका सामग्री वितरण गरिएको छ । युवाहरूले भोली वडा नम्बर १४ मा रहेको दुईवटा स्वास्थ्य चौकी र रानिटार, असिने, झ्याडि, झुलेटार, डाँडाथोक, डाँडापारी, मगरगाउँ, अट्चले सहित तल्लो बस्तीका स्थानीयलाई स्वास्थ्य सामग्री वितरण गर्ने सरोज बोहराले जानकारी दिनुभयो । स्वास्थ्य चौकीलाई भने फेस शिल्ड पनि प्रदान गरिने छ ।

‘हामीले नगरे कस्ले गर्ने, अहिले नगरे कहिले गर्ने’ भन्ने भावना सहित युवाहरूले कोरोना भाईरसको दोस्रो लहरबाट जोगिने उपाय बताउँदै स्वास्थ्य सामग्री वितरण अभियान थालेका हुन् । युवाहरूको अभियानमा दिपेश भण्डारीले ६ हजार २ सय, बिबेक बस्नेतले ६ हजार २ सय, सुजन खड्काले ५ हजार ६ सय ८० रूपैयाँ, आकाश बस्नेतले ३ हजार १ सय र काजिराम बस्नेतले २ हजार रूपियाँ नगद सहयोग गर्नु भएको छ ।

त्यसैगरी शहदेब बस्नेत, सुजन बस्नेत, सरोज बोहरा, मोहन बस्नेत, हरि बानियाँले १/१ हजार पिस र अञ्जन बस्नेतले ५ सय पिस मेडिकल मास्क सहयोग गर्नु भएको छ । दिपक बस्नेतले सानो १ सय पिस सेनिटाइजर ५८ पिस हात धुने साबुन सहयोग गर्नु भएको छ ।