काभ्रेका १३ वटै पालिकामा आईसोलेसन (कुन पालिकामा कति संख्या ?)

धुलिखेल, ३० बैशाख: काभ्रेका १३ वटै पालिकाले कोरोना संक्रमित राख्न आईसोलेसन बनाएका छन् । जिल्लामा सबैभन्दा बढी धुलिखेल र बनेपा नगरपालिकाले ५०/५० बेड क्षमताको अक्सिजन सहितको आईसोलेसन सञ्चालनमा ल्याएका छन् । धुलिखेल नगरपालिकाले सञ्जीवनी माध्यामिक विद्यालयमा आईसोलेसन सञ्चालनमा ल्याएको छ । जहाँ संक्रमित बस्न समेत सुरू गरिसकेका छन् ।

बनेपा नगरपालिकाले ५० बेड क्षमताको आईसोलेसन सञ्चालनमा ल्याएको प्रमुख प्रशासकीय अधिकृत कविराज उप्रेतीले जानकारी दिनुभयो । बनेपा नगरपालिकाले आईसोलेसन पोलिटेक्निकको भवनमा सञ्चालन गरिरहेको छ । ५० बेड क्षमताको क्वारेन्टाइन पनि तयारी अवस्थामा राखिएको छ ।

नमोबुद्ध नगरपालिका र रोशी गाउँपालिकाले संयुक्त रूपमा भकुण्डेमा ४० बेड क्षमताको आईसोलेसन सञ्चालन गरेका छन् । जुन आईसोलेसनको ब्यवस्थापकिय खर्च दुबै पालिकाले बराबर बेहोर्ने छन् । यो जनक माविमा राखिएको छ ।

त्यस्तै पाँचखाल नगरपालिकाले १५ बेड क्षमताको आईसोलेसन सुरू गरेको छ । भुम्लु गाउँपालिकाले पाँचखाल नगरपालिकासँग आईसोलेसन सञ्चालन गर्न समन्वय गर्ने सहमति गरेपछि ५० बेड क्षमताको आईसोलेसन बन्ने छ । यो आईसोलेसनको पनि ब्यवस्थापकीय खर्च दुबै पालिकाले बराबर बेहोर्ने छन् । समाज कल्याण प्रावि र नगरपालिकाको सभाहलमा आईसोलेसन स्थापना हुनेछ ।

मण्डनदेउपुर नगरपालिकाले पनि छुट्टै आईसोलेसन सञ्चालनमा ल्याएको छ । नगरपालिकाले महादेव प्राथमिक विद्यालयमा १५ बेड क्षमताको आइसोलेसन सञ्चालन गरिरहेको छ । नगरपालिकाले डेडिथुम्का क्याम्पसको छात्रबासमा स्बाव संकलन गर्दै आएको छ । यहि छात्रबास भवनमा थप २५ बेड क्षमताको आईसोलेसन सञ्चालन गर्ने गरि काम अघि बढाईएको नगरपालिकाका कोभिड फोकल पर्सन दिपक घिमिरेले जानकारी दिनुभयो ।

चौरीदेराली गाउँपालिकाले १८ बेडको आईसोलेसन सञ्चालन गर्दैछ । जसमा धुसेनी शिवालय अस्पतालमा १० बेडको आईसोलेसन सञ्चालनमा आईसकेको छ । अक्सिजनको ब्यवस्था पनि गरिएको छ । डिसिडब्युसी सामुदायिक अस्पतालमा ५ बेड र धुलिखेल अस्पतालको शाखा सलम्बु स्वास्थ्य केन्द्रमा ३ बेड क्षमताको आईसोलेसन सञ्चालन गर्ने तयार भईरहेको गाउँपालिकाका सहायक स्वास्थ्य संयोजक राजु चौलागाईंले जानकारी दिनुभयो ।

पनौती नगरपालिकाले ४ नम्बरमा नवनिर्मित भवनमा २५ बेड क्षमताको आईसोलेसन सञ्चालनमा ल्याएको छ । आवश्यकता हेरिकन अन्य ठाउँमा पनि आईसोलेसन बनाउने तयारी भईरहेको पनौती नगरपालिकाका स्वास्थ्य शाखा प्रमुख पुरूषोत्तम तिमल्सिनाले बताउनुभयो । अक्सिजनको ब्यवस्था छ ।

बेथानचोक गाउँपालिकाले १० बेड क्षमताको आईसोलेसन तयार पारेको अध्यक्ष प्रेमबहादुर तिमल्सिनाले जानकारी दिनुभयो । आईसोलेसन बेड २५ वटासम्म पुर्याउने तयारी भईरहेको छ । जिल्ला कोभिड संकट व्यवस्थापन केन्द्र (डिसीसीएमसी) काभ्रे मार्फत प्राप्त ५ वटा सिलिण्डर अक्सिजन आईसोलेसनमा राखिने छ ।

तेमाल गाउँपालिकाले १० बेडको आईसोलेसन सञ्चालनमा ल्याएको छ । पालिकाको नयाँ भवनमा आईसोलेसन सञ्चालनमा ल्याईएको हो । पालिकामा सानो ठूलो गरी ८ वटा अक्सिजन सिलिण्डर छन् । जसमध्ये ५ वटामा अक्सिजन रहेको पालिकाका स्वास्थ्य शाखा प्रमुख शिवहरि पाठकले जानकारी दिनुभयो ।

काभ्रेको अति विकट क्षेत्रमा रहेको खानीखोला गाउँपालिकाले तालढुंगा स्वास्थ्य चौकीमा ५ बेड क्षमताको आईसोलेसन तयार गरेको छ । ४० बेड क्षमताको क्वारेन्टाइन पनि तयारी अवस्थामा रहेको पालिकाका प्रवक्ता मान बहादुर गोलेले जानकारी दिनुभयो । पालिकामा ५ वटा अक्सिजन छन् ।

महाभारत गाउँपालिकाले वडा नम्बर ८ घर्तीछाप स्वास्थ्य चौकीमा १५ बेड क्षमताको आईसोलेसन तयार गरेको प्रवक्ता रविन मोक्तानले जानकारी दिनुभयो । आईसोलेसनमा अक्सिजन लैजाने तयारी भईरहेको छ । खानीखोला र महाभारत गाउँपालिकामा कोरोना संक्रमितको संख्या ज्यादै न्यून छ ।

कोरोना भाईरसको दोस्रो लहरबाट जिल्लाको बनेपा, पनौती र धुलिखेल नगरपालिका सबैभन्दा बढी प्रभावित छन् । जिल्लाका सबै स्थानीय तहले स्वास्थ्यकर्मीलाई बिदा बस्न दिएका छैन् ।