पनौतीको भुमिडाँडामा दिउँसै टिपर चलाएको भन्दै युवाहरु आन्दोलित 

धुलिखेल २९, बैशाख: पनौती नगरपालिकाभित्र प्रशासन कार्यालयले तोकेको समय पालना नगरि टिपर सञ्चालन भईरहेको भन्दै स्थानीय युवाले तत्काल रोक्न माग गरेका छन् । नगरपालिकाको वडा नम्बर १२ का कोलाती भूमिडाँडाका स्थानीय युवाहरूले टिपर सञ्चालनमा रोक लगाउन माग गरेका हुन् । उनीहरूले टिपरका कारण आफ्नो क्षेत्र कोरोना संक्रमणको उच्च जोखिममा परेको बताएका छन् ।

युवाहरूले एउटा संघर्ष समिति नै बनाएर सकेसम्म कोरोना भाईरसको चेनब्रेकका लागि केहिदिन कुनैपनि समय टिपर नचलाउन र चलाउनै परे जिल्ला प्रशासन कार्यालयले जारी गरेको समयभित्र मात्रै चलाउन आग्रह गरेका छन् । प्रशासन कार्यालयले टिपर लगायतका निर्माण सामग्री ढुवानी गर्ने सवारी साधन बेलुका ९ बजेदेखि बिहान ५ सम्म मात्रै चलाउन पाउने समय तोके छ ।

प्रशासनले तोकेको समय टिपर चालकले पालना नगरेको र कोरोना संक्रमणको जोखिम बढेका कारण आन्दोलनमा उत्रिएको संघर्ष समितिका संयोजक प्रल्हाद केसीले बताउनुभयो । उहाँका अनुसार टिपरका कारण खानी क्षेत्र आसपासको होटल पसल निर्वाधरुपमा खुलेका छन् । ‘हामी चाहान्छौ केहि टिपर चल्न नै बन्द गरियोस्, यदि त्यसो गर्न सकिदैन भने पनि प्रशासनले तोकेको समय पालना गरियोस्, संयोजक केसीले भन्नुभयो ।’

टिपर चालकहरूले पनि यसरी टिपर चलाउँदा निकै जोखिम रहेको बताएका छन् । ‘यहाँका स्थानीयसँगै हामी आफै जोखिममा छौ, क्रसर उद्योग नै केहि दिन बन्द गरिदिए सबैभन्दा राम्रो हुनेथियो, दिनभरी ८/१० जना भेला भयो, एउटा होटलको कोठामा बस्नु पर्दा कोरोना भाईरसको जोखिम उत्तिकै छ, एकजना टिपर चालकले भने ।’