कोठामा निसासिएर काभ्रेकी तामाङको मृत्यु

२१ बैशाख, धुलिखेल: आगोले निसासिएर काभ्रे तेमालकी सुनिता तामाङको मृत्यु भएको छ । सूर्यविनायक नगरपालिका वडा नम्बर १० मिलनचोकमा डेरा गरी बस्ने तेमाल गाँउपालिका वडा नम्बर ३, कुन्डाल घर भएकी २२ वर्षीया सुनिता तामाङको मृत्यु भएको प्रहरीले जनाएको छ । सुत्केरीलाई सेकाउन बालेको आगोमा निसासिएकी सुनिताको उपचारको क्रममा मृत्यु भएको हो । दुईजना घाइते छन् ।

घाईते हुनेहरूमा ४० वर्षीया शान्ति माया ब्लोन तामाङ र उहाँका १८ वर्षिया अनिता तामाङ रहनु भएको छ । घाईते दुबै जनाको मध्यपुर अस्पतालमा उपचार भइरहेको छ ।

प्रहरीका अनुसार बैशाख १९ गते अनिता सुत्केरी हुनुभएको थियो । सुत्केरीलाई तातो बनाउन मकलमा कोइला बालेको र कोठाको झ्याल ढोका बन्द गरेकाले अक्सिजनको मात्रा कमी हुन पुग्दा कोठाभित्र रहेका तीनैजना बेहोस हुन पुगेका थिए ।