सिन्धुपाल्चोकको ठूलो धादिङ स्वास्थ्य चौकीले पायो एम्बुलेन्स

२० बैशाख, धुलिखेल: सिन्धुपाल्चोकको लिसंखुपाखर गाउँपालिकाले वडा नम्बर १ मा रहेको ठूलो धादिङ स्वास्थ्य चौकीलाई एम्बुलेन्स हस्तान्तरण गरेको छ । स्वास्थ्य चौकी व्यवस्थापन समितिलाई आज पालिका अध्यक्ष कमल नेपालले एम्बुलेन्स हस्तान्तरण गर्नु भएको हो ।

नेपाल सरकारको राजस्व छुटमा खरिद गरिएको एम्बुलेन्स सञ्चालन गर्ने जिम्मा पनि स्वास्थ्य चौकी व्यवस्थापन समितिलाई दिईएको छ । स्वास्थ्य चौकी व्यवस्थापन समितिको अध्यक्ष वडाध्यक्ष रहने व्यवस्था छ ।

एम्बुलेन्स पाएपछि वडाध्यक्षले पासाङ लाल तामाङले ठूलोधादिङ सहित आसपासका नागरिकलाई बिरामी पर्दा निकै सजिलो हुने भन्दै खुशी ब्यक्त गर्नु भयो । यसअघि ठूलोधादिङमा एम्बुलेन्स नहुँदा लिसंखु, अत्तरपुर, ठूलोपाखर लगायतका ठाउँका एम्बुलेन्स प्रयोग गर्नु पर्ने अवस्था थियो ।

कोरोना भाईरसको दोस्रो लहर फैलिए रहेको यो अवस्थामा एम्बुलेन्सले त्यस क्षेत्रका नागरिकलाई थप सेवा पुग्ने पालिका अध्यक्ष नेपालले बताउनुभयो