पाँचखालमा श्रीमतीले गरिन श्रीमानको हत्या

२० बैशाख, धुलिखेल: काभ्रेको पाँचखाल नगरपालिका वडा नम्बर १२ जरेटारमा श्रीमतीले श्रीमानको हत्या गरेकी छन् । करिब ३५ बर्षीय राममाया दनुवारले ३९ बर्षीय श्रीमान निराजन दनुवारलाई धारिलो हतियार प्रहार गरि हत्या गरेको प्रहरीले जनाएको छ ।

वडाध्यक्ष गोपाल बहादुर दनुवारका अनुसार घटना गएराति भएको हो । ‘मलाई बिहानै फोन आयो, गएर हेर्दा हत्या भईसकेको रहेछ, वडाध्यक्ष दनुवारले भन्नुभयो ‘धारिलो हतियार प्रहार गरी हत्या गरेको पाईयो ।’

राति घरमा श्रीमान श्रीमती मात्रै थिए । राममायाले धारिलो हतियार श्रीमानको यौनाङ्गमा समेत प्रहार गरेको बताईएको छ । हसियाँ प्रहार गरी हत्या गरेको बताईए पनि  घटनास्थलबाट भने प्रहरीले हसियाँ, खुकुरी र खुर्पा बरामद गरेको छ । राममायालाई प्रहरीले नियन्त्रणमा लिएको छ ।