सिन्धुपाल्चोक कुविण्डेका कोरोना संक्रमितको धुलिखेल अस्पतालमा मृत्यु

१८ बैशाख, धुलिखेल: सिन्धुपाल्चोकको कोरोना संक्रमितको धुलिखेल अस्पतालमा मृत्यु भएको छ । अस्पतालका इमरजेन्सी बिभागका प्रमुख डाक्टर सानु श्रेष्ठका अनुसार ती संक्रमितको आज बिहान उपचारकै क्रममा मृत्यु भएको हो ।

३७ बर्षीय संक्रमितलाई हिजो धुलिखेल अस्पतालको इमरजेन्सी कक्षमा भर्ना गरिएको थियो । मृतकको चार बर्षअघि मुटुको भल्भ फेरिएको थियो ।

डाक्टर सानुका अनुसार ती संक्रमितको अवस्था अस्पताल आईपुग्दा निकै जटिल बनिसकेको थियो । उनमा छातीको समस्याका साथै गम्भीर निमोनिया पनि भईसकेको थियो ।

कोरोना भाईरसको दोस्रो लहर अन्तर्गत सिन्धुपाल्चोक जिल्लामा कोरोना भाईरसका कारण मृत्यु हुने उनै पहिलो व्यक्ति हुन सक्ने अधिकारीहरूले बताएका छन् । सिन्धुपाल्चोक जिल्लामा कोरोना भाईरसको संक्रिय संक्रमितको संख्या पनि दिनप्रतिदिन बढिरहेको छ । नियन्त्रणका लागि भरपर्दो प्रयास भने भएको छैन ।

सिन्धुपाल्चोक जिल्लामा प्रमुख जिल्ला अधिकारी समेत संक्रमित भएका छन् । हिजो बसेको विपद् ब्यवस्थापन समितिको बैठकले पसल खोल्ने समय भने तोकेको छ ।