कोरोना कहरः धुखिलेलका संक्रमितको मृत्युबाट सिक्नै पर्ने कुरा

१६ बैशाख, धुलिखेलः धुलिखेल नगरपालिकाका ८२ बर्षीय एक बृद्धलाई बुधबार धुलिखेल अस्पतालमा भर्ना गरियो । अवस्था निकै जटिल बनिसकेका ती बृद्धलाई नेपाली सेनाले अस्पतालसम्म ल्याएर भर्ना गरेको थियो ।

घरमै थलिसकेका बृद्धलाई अस्पतालको आकस्मिक कक्षमा राखेर चिकित्सकहरुले उपचार थाले । अस्पतालको आकस्मिक विभागका प्रमुख डाक्टर सानु श्रेष्ठ भन्नु हुन्छ ‘उहाँमा गम्भीर खालको निमोनिया भइसकेको रहेछ, त्यस्तै उच्च रक्तचापको पनि समस्या देखियो ।’

चिकित्सकहरुले पनि सकुञ्जेल प्रयास गर्ने हुन् । सक्दै नसकेपछि त के नै लाग्छ र । आकस्मिक कक्षमा राखेर उपचार असम्भव भएपछि आइसियूमा लैजाने तयारी गर्दा गर्दै ती बृद्धले संसार छाडे । काभ्रे जिल्लामा कोरोना भाइरसको दोस्रो लहर शुरु भएयता मृत्यु हुने ती बृद्ध सम्भवतः पहिलो होलान् ।

काभ्रेमा सक्रिय संक्रमितको संख्या २ सय नाघि सकेको छ । त्यस मध्ये अधिकांश संक्रमित घरमै छन् । घरमा चिकित्सकको प्रत्यक्ष निगरानी हुदैँन । संक्रमित आफै र घर परिवारले शरीरको ख्याल गरेनन् भने अवस्था निकै जटिल बनिसको हुन्छ । अस्पताल पुगिदैमा बाँचिने होइन । उपचार लाग्ने अवस्थासम्म मात्रै बाँचिने हो अन्यथा मर्नुको विकल्प अरु केहि देखिँदैन ।

त्यसैले अवस्था गम्भीर हुने बेलासम्म चुप लागेर घरैमा बस्नु हुदैँन । अस्पताल जाँदा थप कोरोनाको जोगिम हुन्छ भनेर ब्यवस्था गर्यो भने त्यसको हानि आफैले ब्यहोर्नुपर्ने हुन्छ । सकेसम्म यो कोरोना भाइरसको संक्रमणको मृत्युबाट आफु र आफ्ना आफन्तलाई जोगाउन लागौँ ।

अहिले देशभर कोरोना भाइरसको दोस्रो लहर तीब्र गतिमा फैलिरहेको छ । देशका धेरै अस्पताल संक्रमितले भरिएका छन् । धेरै जसो संक्रमित होम आइसोलेसनमा छन् । यस्तो बेला परिवारको सबै सदस्य र घरछिमेकीले स्वास्थ्यका मापदण्ड कडाइका साथ अपनाउनुपर्छ । निको नहुदाँसम्म नभेट्दैमा हाम्रो सर्वस्व सकिदैन । होम आइसोलेसनमा बसेकालाई थप हेरचाह र ख्याल गर्नुपर्ने आवश्यकता हुन्छ ।

पहिलेको जस्तै सामान्य हो भनेर खेलाँची गर्नु हुदैँन । कोरोना भाइरसको दोस्रो लहर निकै कडा र तीब्र गतिमा एक अर्को बीच फैलन सक्ने चिकित्सकहरुले बताइरहेका छन् ।