पनौतीमा राती ८ बजेपछि पसल खोल्न नपाइने, भोलीदेखि विद्यालय बन्द

१३ बैशाख, धुलिखेल: काभ्रेको पनौती नगरपालिकाले राति ८ बजेपछि बजार पसल नखोल्न उर्दी जारी गरेको छ । आज बसेको विपद् ब्यवस्थापन समिति बैठकले राती ८ बजेपछि बजार, पसल नखोल्ने र निर्धारित समयमा खोल्दा पनि स्वास्थ्य सावधानीको मापदण्ड कडाईका साथ पालना गर्न भनेको छ ।

समितिले भोलीदेखि लागु हुनेगरी नगरपालिकाभित्र सञ्चालनमा रहेका सामुदायिक, संस्थागत विद्यालय र क्याम्पसहरु बन्द गर्ने निर्णय समेत गरेको छ । समितिले सभा, सम्मेलन, गोष्ठी जस्ता मानिसको जमघट हुने कुनै पनि कार्यक्रम नगर्न र त्यस्तो कार्यक्रममा सहभागि नहुन नगरबासीलाई आग्रह गरेको छ ।

त्यस्तै सार्वजनिक यातायातका साधन समेत निर्धारित स्वास्थ्य मापदण्ड विपरित हुने गरी नचलाउन समितिले ब्यवसायीहरुलाई अनुरोध गरेको छ । नगरपालिका क्षेत्रभित्रका मठ, मन्दिर, देवालयहरु समेत भिड नगर्न र सिमित ब्यक्तिले यस्ता काम गर्दा समेत भौतिक दुरी कामय गर्न र मास्कको प्रयोग गर्न भनिएको छ ।